مشكلة من يخطب البنت وبعد فتره يقول؟

[شموخ رجل]

بسم الله الرحمن الرحيم
اللهم صل على محمد وال محمد الطيبين الطاهرين
السلام عليكم ورحمة الله وبركاته
أخواني وأخوتي المحترمين
اليوم جاء في بالي موضوع وحبيت اطرح الموضوع عليكم ونتناقش فيه وان شاء الله يكون ماطرح في المنتدى عشان لانتفشل هههه المهم هو قضيه مادري يمكن تكون عويصه بعض الشي بل هي كذالك وبلخصوص في نفسية البنت المخطوبه.
ليش الواحد لما يتقدم الى خطبة بنت وتتم النظره الشرعية ويتم عقد النكاح الشرعي وبعد فتره من الخطوبة قد يكون شهر أو اكثر وبعد الروحات والجيات ووووو يقول الى أهله الصراحه خطيبتي ماعجبتي ياسلام ماعجبتني ؟ ليش مادري يتعذر بي أعذر ليسة مشروعة لا والمشكله مو في المشكلة في البنت التي تعلقت به وماذا سيحصل بها من فك الخطوبة الاتلحضون في هذا الأيام أنتشرت في مجتمعنا مثل تلك الأمور لا وبعضهم يقول عادي حتى لو مارجعت لي شي من المهر مو مشكله هل أصبحت بنات الناس سلعه يشترا بها ويبعاع
أرجو مشاركتي في الموضوع وأبداء وجهة نظركم ولكم جل التحيه والاحترام

[أحلآهم أتحدآهم]

موضوع حلو الحين دائم الي يعمل كذا ..

يقول أبي نظره شرعيه ويروح يشوفها ويقول والله مابيها ..
ليش ؟؟!

يقول أول ماسألتها ردت علي ..

مـآأحلآك والله والحين داائم الي يسوي كذا ..
يمكن أكون ضد النظره الشرعيه لأن هو يبيني لو يبي جمالي ..
مع اني واثقه من حالي لو يجي أحد ويطلب نظره ماتوقع أهلي يوافقو هههههههههههه

بس البنت مو لعبه توها عاجبت ولما عقدت ماتبيها ..
أهو يكمل حياته وياخذ وحدهـ ثانيه وأهي يحكمو عليها مطلقه << صح !!

أصلاً نفسية البنت تضرر بس لو مجرد ماطلعت التحاليل عدله ..
كيف "
بعد يعقد ومابيبها وشافها وعقد << يسخر ..

برأي يروح يشوف أخصائي نفسي أحسن ..

تقبل مروري + تحياتي أحلاهم ..

[..سر وجودي..]

السلام عليكم ورحمة الله وبركاته..

موضوع جميل ومهم للنقاش..
>>>تمنت يكون في منتدى الحياة الزوجية

للاسف نقدر نقول هالشي صاير موضة هاليومين ..
كل من جا بسبب او بدون سبب قال بيفك.. بعد ماشافها وكلمها وتمعن فيها.. واخرتها قال ايش قال ماعجبتني قال..

لا وازيدك من الشعر بيت.. بعض الاشخاص الذكور للأسف الله يهديهم بعد مايشوف البنت.. مايكفيه انه رفضها .. بل وايضا يوصفها لبعض الناس..
مثال.. شخص يقول لاخر.. انا بخطب من بيت فلان.. يرد عليه الطرف الاخر ويقول.. وش لك بهذولي ذولا اشكالهم كذا وكذا وكذا.. ويبدا في الوصف..

ومن هذه النماذج كثير وكثير..بل ويتبجح امام اصدقائه اذا سألوه ليش فركشت الموضوع..يرد ويقول.. والله جيكر .. انا احلى منها.. ومن هالكلام اللي ماله سنع..

لي عودة تعبت من الكتابة واحس نفسي منقهرة

[شامبو]

شوف اخي يارجال كلك شموخ
الرجال طول عمره يحلم بحواء تشاركه حياته
بس لما ينصدم بواقع مرير
محد يحس فيه ولايفهمه
يعني مثلاااا
الله يستر عليها وحده انخطبت وبعد خطوبتها ب7 شهور كبرت المشاكل بينهم وبالأخير طلع كلامه كالتالي .
انها مو عاجبته لا كشكل ولا لبس ولا أسلوب تعامل والصدق انها ماكانت ذوووق بولاا شي
والمصيبه لما فكت خطوبتها اتهمت وحده من اهلها انها السبب بذلك

كييييف ؟.؟
لفقت ليها قصه خرافيه محد صدقها
قالت ان البنت جات الحفله ودخلت عليهم .. المعاريس .. متعمده
مع العلم ان البنت ماحضرت الحفله لأنو كانت عندهم فاتحه

فالفاشل واللي ماعنده سالفه غصب يسوي شوشره عشان يظهر نفسه بريئ
والله يستر عليها
والعيوب بالأثنين
ممكن ماتناسب تفكيره مايقدر يتفاهم وياااهااا

[القلب السليم]

مشكور أخوي لطرح الموضوع المهم..
مشكلة حقيقية ..صارت وتصير في هذا الزمن ..
الله يستر على بناتنا ..وأولادنا ..
بس عشان لا نظلم الذكور..
فيه بعض الاناث من تفعل ذلك ..
يعني أعرف وحدة جلست مع خطيبها بس ساعة طلعت من عندة قالت مو عاجبنها طريقة كلامة ويذخن وهي ماكانت تعرف أنة يذخن ..
وفسخو عقد النكاح..

[..سر وجودي..]

وسالفة اللي تطلقت في نفس الليلة واللي احتد النقاش فيها..
اللي طلبت بوسة من الليلة الاولى..

لا اظن ان الاعضاء نسوها

[القلب السليم]

لا سر وجودي ..الا سالفة البوسة من أول ليلة مانقدر ننساها ....

[حلم البنفسج]

والله هالمشكله مابتخلص ابدا
لان للاسف شبابنا وبناتنا ينقصهم من الوعي والثقافه وللاسف بعض حتى التحضر
وعلشان اكون منصفه ترى حتى البنات بعد عليهم سوالف عجيبه غريبه
اما قصه سر وجودي مستحيل ننسها
حتى شبابنا وضعهم غريب
بالموت يخطبوا واذا خطبوا يفسخوا خطوبتهم
يمكن يكون هناك سبب رئيسي واتمنى مااحد يفهمني غلط
الام لما تختار لولدها تختار على مزاجها
ويمكن مايعجب الولد لان الولد مو مفتوح له المجال انه يختار
وعلشان نكون منصفين بعض الشباب يوهموا نفسهم انهم بيختاروا لنفسهم ويخربوا الدنيا وفي النهايه الضحيه البنت في جميع الاحوال
بس ترى فسخ الخطوبه في النهايه افضل من الطلاق بعدين

[تاروتية]

مشكور اخوي على هالموضوع

نجي للمهم >> بدت تتفلسف

للاسف هالشي قاعد يصير في مجتمعنا واجد ومنتشر بقوة لاسباب تافهة بالمرة...

ومانقدر نظلم الشباب لان للاسف البنات بعد اوقات يزودوها....

قبل فترة شفت وحدة حاطة مشكلتها في منتدى

انها تبي تفك خطوبتها لان خطيبها مايجيب ليها هدايا

وهي تسمع عن صاحباتها المخطوبات ان كل يوم والثاني جايبين ليهم رجالهم هدايا

وهي تتحسر

صحيح الهدايا تحبب في الطرف الاخر

بس مو الى هالدرجة وصلنا لهالمستوى يعني الرجال اخلاق ودين ماشاءالله ..

تتركه علشان هالسبب بس ؟؟

واللي يفكوا قبل الزواج باسبوع واللي من اول لية قال ماعجبتني

وووو

الموضوع يطول

عفر هدرت واجد

سوري

[عاشق السماء]

وعليكم السلام ورحمة الله وبركاته
لك تحية عطرة أخي شموخ رجل
وأهلاً بك وبمواضيعك
موضوعك قضية واقعية ومتزايدة
هناك أمور تربوية لم يتربى عليها الكثير من الخاطبين
وحتى لم يتم التركيز عليها من قبل الآباء والأمهات
في حياة الأبناء والأمهات
فكان تركيز أغلب العوائل على الماديات من جهة وعلى ظاهر الأمور من جهة أخرى مما ساهم في انفلات زمام الأمور
فهناك الكثير من الشباب والبنات
ملئوا الفراغ النفسي والعاطفي بقصص الحب والمسلسلات
وعاشوا أحلامهم وترعرعوا في أيامهم ولياليهم على الأحلام
نرى من اتخذوا من لاعبي كرة القدم قدوة لهم
ونرى من اتخذت تلك الممثلة قدوة لها في اللبس والزينة
وعندما تحين ساعة المشاكل يستغربوا لحدوث الفسخ على أسباب تافهة تنم عن جهل المخطوبين لهدف هذا الزواج
المقدس بعقده المبارك والذي أصبح لدى من يخطبون أمر روتيني
بإمكاني التخلص منه لأتفه الأسباب
فلذلك نرى تشرط الشباب والشابات وطلباتهم المختلفة والكثيرة
تنقلب رأساً عليهم وخصوصاً إذا ركزوا على ظاهر الأمور
وكل شي يزيد عن حده ينقلب ضده
وتقبلوا جميل تحياتي السماوية
عاشق السماء

[شموخ رجل]

اقتباس: المشاركة الأصلية كتبت بواسطة أحلآهم أتحدآهم   موضوع حلو الحين دائم الي يعمل كذا .. يقول أبي نظره شرعيه ويروح يشوفها ويقول والله مابيها .. ليش ؟؟! يقول أول ماسألتها ردت علي .. مـآأحلآك والله والحين داائم الي يسوي كذا .. يمكن أكون ضد النظره الشرعيه لأن هو يبيني لو يبي جمالي .. مع اني واثقه من حالي لو يجي أحد ويطلب نظره ماتوقع أهلي يوافقو هههههههههههه بس البنت مو لعبه توها عاجبت ولما عقدت ماتبيها .. أهو يكمل حياته وياخذ وحدهـ ثانيه وأهي يحكمو عليها مطلقه << صح !! أصلاً نفسية البنت تضرر بس لو مجرد ماطلعت التحاليل عدله .. كيف " بعد يعقد ومابيبها وشافها وعقد << يسخر .. برأي يروح يشوف أخصائي نفسي أحسن .. تقبل مروري + تحياتي أحلاهم ..

سلمت أناملك
أختي الكريمه
على تلك المداخله الروعه
ربما أتفق معك على من يقوم بتلك الأشياء يروح يشوف أخصائي نفسي أحسن
تقبلي جل التحييييات

[شموخ رجل]

اقتباس: المشاركة الأصلية كتبت بواسطة ..سر وجودي..   السلام عليكم ورحمة الله وبركاته.. موضوع جميل ومهم للنقاش.. >>>تمنت يكون في منتدى الحياة الزوجية للاسف نقدر نقول هالشي صاير موضة هاليومين .. كل من جا بسبب او بدون سبب قال بيفك.. بعد ماشافها وكلمها وتمعن فيها.. واخرتها قال ايش قال ماعجبتني قال.. لا وازيدك من الشعر بيت.. بعض الاشخاص الذكور للأسف الله يهديهم بعد مايشوف البنت.. مايكفيه انه رفضها .. بل وايضا يوصفها لبعض الناس.. مثال.. شخص يقول لاخر.. انا بخطب من بيت فلان.. يرد عليه الطرف الاخر ويقول.. وش لك بهذولي ذولا اشكالهم كذا وكذا وكذا.. ويبدا في الوصف.. ومن هذه النماذج كثير وكثير..بل ويتبجح امام اصدقائه اذا سألوه ليش فركشت الموضوع..يرد ويقول.. والله جيكر .. انا احلى منها.. ومن هالكلام اللي ماله سنع.. لي عودة تعبت من الكتابة واحس نفسي منقهرة

ههههه خلاص أذ تبي الموضوع يكون في قسمك أدفعي خلو رجل هههه
المهم
صادقه
أختي الفاضله
الصراحه منتشر هذا الأيام تلك القضيه أذ أنسان يبي يخطب يقومو ضعاااف النفوس يفصلو في بنات ذاك البيت ويحطون في أعراضهم هاذي متينه وهاذي ضعيفه وهاذي حلوه وهاذي مو لهناك ووووووو أنا واحد من الناس سمعت كم واحد يتناقش مع واحد من ضعاف النفوس يتكلم مع الثاني ويقوله من وين خطبت يقوله من بيت أفلان او من وين خطبتو الى أخوكم يقوله من بيت فلاتان ويبتدي الحش وبلخصوص أذ تقدمو الى ذالك البيت وصار رفظ من الطرف الثاني الله يعين راحت فيها البنت المسكينه ...
كم أسعدني مرورك وتواجدك في صفحتي
تقبلي جل التحييييات

[شموخ رجل]

اقتباس: المشاركة الأصلية كتبت بواسطة شامبو   شوف اخي يارجال كلك شموخ الرجال طول عمره يحلم بحواء تشاركه حياته بس لما ينصدم بواقع مرير محد يحس فيه ولايفهمه يعني مثلاااا الله يستر عليها وحده انخطبت وبعد خطوبتها ب7 شهور كبرت المشاكل بينهم وبالأخير طلع كلامه كالتالي . انها مو عاجبته لا كشكل ولا لبس ولا أسلوب تعامل والصدق انها ماكانت ذوووق بولاا شي والمصيبه لما فكت خطوبتها اتهمت وحده من اهلها انها السبب بذلك كييييف ؟.؟ لفقت ليها قصه خرافيه محد صدقها قالت ان البنت جات الحفله ودخلت عليهم .. المعاريس .. متعمده مع العلم ان البنت ماحضرت الحفله لأنو كانت عندهم فاتحه فالفاشل واللي ماعنده سالفه غصب يسوي شوشره عشان يظهر نفسه بريئ والله يستر عليها والعيوب بالأثنين ممكن ماتناسب تفكيره مايقدر يتفاهم وياااهااا

تحصل وكثير في مجتمعنا للأسف مثل تلك الأشياء وتلك من عدم التفاهم بين الطرفين الله يستر على الجميع والله يوفق الجميع بحق محمد وال محمد الطيبين الطاهرين
مشكوره ويعطيش ألف عافيه
أختي الكريمه
عطرتي الموضوع بمرورك
تحياااتي لك

[شموخ رجل]

اقتباس: المشاركة الأصلية كتبت بواسطة القلب السليم   مشكور أخوي لطرح الموضوع المهم.. مشكلة حقيقية ..صارت وتصير في هذا الزمن .. الله يستر على بناتنا ..وأولادنا .. بس عشان لا نظلم الذكور.. فيه بعض الاناث من تفعل ذلك .. يعني أعرف وحدة جلست مع خطيبها بس ساعة طلعت من عندة قالت مو عاجبنها طريقة كلامة ويذخن وهي ماكانت تعرف أنة يذخن .. وفسخو عقد النكاح..

أكيد خيوه هناك من الطرفين من الذكور والاناث يحصل عندهم ذالك الشي بس في مجتمعنا هم الذكور بنسبة 70% .... وانا أشوف ان هذا ليس عذر انه موعاجبنها طريقة كلامة ويذخن تقدر هي مع الأيام تقنعه وتتفاهم معا وليس بمجرد ساعة تقدر تحلل شخصية خطيبهااا الله يعين ..
يسلمو وعساك على القوه
خيوه
أزداد الموضوع جمااااال بمرورك
تقبلي جل التحيييات

[شموخ رجل]

اقتباس: المشاركة الأصلية كتبت بواسطة ..سر وجودي..   وسالفة اللي تطلقت في نفس الليلة واللي احتد النقاش فيها.. اللي طلبت بوسة من الليلة الاولى.. لا اظن ان الاعضاء نسوها

ههههههه بل بل بل من أول ليله عاااااااااااد بعد شهر شهرين
الصراحه انا واحد من الأعضاء ماأدري عن شي لاتتهموني ههههه