عطونا سوالفكم

[نور الشمس]

أخي العزيز .. باب العين ..

ان شاء الله إجازة سعيدة .. ويسعدنا عودكم مجدداً ..

لا تستعجلوا علي .. بس ان شاء الله بزودكم بالمزيد .

تحياتي

نور

[نور الشمس]

صلوا على محمد وآل محمد ..

عندي لكم سالفة ان شاالله تعجبكم

كان في تاجر يعيش في البحرين اسمه حجي حسن وعنده ولد اسمه عبد الله .. متخصص في بيع القماش ، عبد الله كان ذراع اليمين بالنسبه لأبوه .. يقوم بأعمال الوالد بأحسن ما يكون .. وفي يوم من الأيام حجي حسن جته فكره .. وقال : وش رايك يا ولدي تروح تاروت ؟؟ تاخذ القماش من التجار هناك وتبيعه ليهم هني في البحرين وبعدين نودي ليهم بيزاتهم وناخذ احنا نصيب تعبتنا .. !! ( طبعاً كان داك الوقت القماش غالي في البحرين ... يعني أغلى من بيعه في تاروت ) .. فكر عبد الله وقال : إللي تشوفه أبويي .. أنا من إيدك هذي لأيدك هذي .. ، الوالد : عفيه عليك ياولدي .. رجال !! .. وبدا عبد الله يستعد للسفر .. ولما وصل تاروت .. وعرض ( الصفقة ) على أهل المنطقة .. عجبتهم الفكرة .. واتفقوا مع عبد الله على أنه يكون وسيط بينهم وبين تجار البحرين ..

مرت السنين .. وعبد الله وأبوه ماشية أمورهم على أحسن حال .. والله مبارك ليهم في تجارتهم مع أهل تاروت .. ، عبد الله توسعت أعماله في تاروت .. وصار لازم يستقر فيها .. وفعلاً تزوج عبد الله من زهراء من بنات تاروت .. وما زال مستمر في شغله مع الوالد ... وتمرالسنين .. ويصير عند عبد الله كوم ولاد .. وطبعاً توارثوا المهنة من أبوهم وجدهم حجي حسن إللي يزوروه باستمرار .. وصاروا مع الأيام هم الوسيط بين حجي حسن وولده عبد الله .. وفي يوم من الأيام .. أرسل عبد الله ولده يوسف للبحرين ومعاه قماش أهل تاروت .. وقال له تروح لأبوك العود وتبقى معاه لين ما تبيعه كله ترجع هني .. ومعاك حساب الناس .. زين .. !! للأسف يوسف ما كان شاطر في المهنة مثل أبوه وجده ... المهم لما وصل البحرين .. كان حجي حسن يستعد للسفر لبمبي .. يبيع القماش هناك .. ولما شاف يوسف أبوه العود بيسافر .. قال: ويش رايك أبويي العود أروح وياك .. وأبيع قماش تاروت هناك بعد يمكن نربح أكثر .. ؟؟ .. حجي حسن : لا يا ولدي هذا مال الناس .. أول اسأل أبوك .. لا توصل وتتصرف .. ، قام يوسف ورسل مكتوب لأبوه .. يستشيره بالسفر لبمبي .. ، وبعد كم يوم جا الخطاب من عبد الله .. بالنهي وقال لولده ..(( لا تروح يا ولدي وقول لأبوك العود لا يروح بعد .. ترى السوق طايحة في بمبي ها لأيام .. )) ... حجي حسن لما سمع هالكلام .. عصب وقال : جا !! بيسوي نفسه أخبر مني هالولد .. أنا باروح وعلى الله .. قال طايحة سوقها .. الله يخلف عليك يا عبدالله .. ، ويش انت بتروح وياي لو بطاوع أبوك ؟؟ .... يوسف: لا أبوي العود باروح وياك .. انت أعلم من الوالد .. وأكيد الوالد غلطان ... المهم .... راحوا اثنينهم ... ورجعوا بعد مدة .. إيد صفرة .. وإيد خالية ... وحجي حسن مو عارف ويش يسوي .. وين يودي وجهه من الناس .. ومن وين يرد ليهم حقوقهم ... ، يوسف رجع البلد .. وقال لأبوه : أبويي .. .. .. اسمح لي .. ما سمعت كلامك .. رحت مع أبويي العود .. وخسرت بيعتنا .... عبد الله ما تمالك نفسه ... طاح في يوسف ضرب .. طيح الله حظك .. ياللي ما تخاف ربك .. أنا وش قلت لك .. ها ؟؟ .... وطبعا بعد ها لمعركة الطويلة بين عبد الله وولده .. عبد الله طرد يوسف من البيت .. وهو .. طاح مغشي عليه .. وظل باقي حياته .. تجارته طايحة في الأرض .. يمشي منزل راسه .. وين ما يروح الناس تطالبه بفلوسهم .. لين ما مات .. الله يرحمه .. وراح واحد من ولاده للناس يسألهم يبروا ذمته ... بعض الناس ترحموا عليه وبروا ذمته .. وبعض الناس سكتوا .. ولليوم ليها حقوق .. والله العالم هل بروا ذمته لو لا .. وصار واحد من ولاده اسمه سلمان .. يقول لأخوانه إللي أكبر منه .. ادفعوا ديون أبويي .. حرام عليكم ترى الناس ما برت ذمته .. بس الأخوان ساكتين .. ومو هامنهم .. سلمان ما كان بإيده حيله .. فوض أمره لرب العالمين .. وقال إنا لله وإنا إليه راجعون ..

الفاتحة لروح حجي حسن ، حجي عبد الله ، حجي يوسف ..

تحياتي

نور

[باب العين]

تسلمي ويسلم قلمك يا بنت الأجاويد يا نور .

قصة حليوة ، ما كنت اعرفها من قبل .

بس ما قلتي لينا ما هو القماش ؟ هل يعني اللآليئ ؟

[نور الشمس]

الله يسلمك أخي العزيز ..

والله تعلمنا الهدرة مع كبار السن بس عشان إثراء منتدى التراث ...

نعم بالضبط القماش هو اللآليء ..

تحياتي

نور

[قلب من دانتيل]

يؤيؤيؤيؤيؤيؤ
رحمة الله عليك ياحجي حسن وحجي عبد الله وحجي يوسف
ويش خانته الحين في القبر يوم اللي الناس مو باريين ذمته
الله يساعدهم يارب ويغفر ويحسن اليهم ..

نور الشمس غناتي
طلعتي تقصي عدل ماشاء الله عليييييش,,

اختك قلب .

[نور الشمس]

أفا يا قلب .. أعجبش .. !!

ترى الجهال في عيلتنا ما يبغوا أحد يقول ليهم قصة إلا أني

تحياتي

نور

[سحايب شوق]

مرحبا..
سوالفكم حلوه لكنها ضحكتني وبكتني في نفس الوقت ذكرتني بأيام أمي العوده الله يرحمها وأيام الخرافات مثل (أم المواقع..ميم ماتلمس الملح..عشق أسمر بند..طنبلوه..هش الهشاش) طبعا هذي أسماء خرافات كانت تقصهم علينا امي العوده كل ليله بس بشرط لازم نطاوعها ونبكر ليها القدو ..
على العموم كثروا من هالسوالف الحلوه وبالذات سوالف الجنانوه وأني عندي قصص وايد بس الله يلعن ابليس نسيتهم الحين ..
تحياتي..

[شروفه]

(أم المواقع..ميم ماتلمس الملح..عشق أسمر بند..طنبلوه..هش الهشاش)

أهلا بكِ أختي سحايب شوق

أو مرة اسمع بالخرافات ننتظر تقصيهم لنا

[نور الشمس]

هلا أختي سحايب شوق ..

شكرا لمرورك بسوالفنا .. وزين انها عجبتك

بس خرعتني هالأسماء العجيبة .. ننتظر أن تقصيها لنا لنفهم مغزاها ..


تحياتي

نور

[سحايب شوق]

هلا فيكم الأخت شروفه , نور الشمس
بالفعل هذي أسماء قصص وخراريف جداتنا غريبين لكنهم حلوين مره بس المشكله انهم اطوال بالذات أم المواقع والمشكله الثانيه اني نسيت بعضهم لكن بحاول أقص وحده خلال هالأيام على شكل أجزاء مثل ماكانت أمي العوده تسوي مثل مسلسل طاش ماطاش وعندها بعد فواصل اعلانيه على مزه ومزتين من القدو
على العموم غاليين والطلب رخيص
تحياتي

[باب العين]

المواقع..ميم ماتلمس الملح..عشق أسمر بند..طنبلوه..هش الهشاش) طبعا هذي أسماء خرافات كانت تقصهم علينا امي العوده كل ليله بس بشرط لازم نطاوعها ونبكر ليها القدو ..

نعايد عليكم بلخير والعافية والسعادة .

لا يكون جدتش هي جدتي ، رحمهم الله جميع .

كل هذه الخراريف الحلوة سمعتهم وكنت اسبح في عالم الخيال مع كل حرف واسم وفعل بخرج من فم الجدة المرحومة .

لم تذكري : أحمد قيرع – من يدق الياسمينة – الاطلسي وحمامة اللوا – حمام يچفخ وسدة تغني – شاه عباس . وغيرهم الكثير من القصص التي لا أتذكر غير اسمائهم .

[نور الشمس]

واااااااااااااااو .... ما شاء الله لا إله إلا الله .. عطونا من هالسوالف الزينة لا تبخلوا ..

أخوي باب العين تفضل .. صلي على محمد وآل محمد .. وقول .. لا تخاف اني بابكر لك التعميره .. هههههه


تحياتي


نور

[سحايب شوق]

تسلم أخوي باب العين جبرت بخاطري لأن أول مره أحد يقول لي انه يعرف هالخرافات بس وش رايك في خرافة ( اسرور ) ماكانت فلم الرعب مال ذيك الأيام أني صراحه كنت أخاف منها ..
تحياتي..

[ميثاق]

[align=center]سالفة اسرور وسويرة والحمامة الي تصيح وتقول( يافاتة يابتي)
هذي السوالف كنت اسمعها من عمتي الله يطول بعمرها
بس السوالف الباقية الي قلتوا على اساميها
اول مرة اسمع عنها
يالله عاد احنا نستناكم عشان تقولوها لنا
لاتتأخروا مو كل واحد يعزم على الثاني [/align]

[نور الشمس]

يالله .. تحمسنا ..

وينكم اخواني... باب العين .. وينك ؟؟

أختنا سحايب شوق .. ننتظر لا تبخلي علينا ... يالله سمي واحنا كلنا آذان صاغية ..


تحياتي

نور