موضة الكولونات بالزواجات ؟؟؟

[ياوديعة علي]

اللهم صل على محمد وآله


الموضوع بالفعل يخص حواء بس حبيت آدم بعد يفرض رايه بالمسئله

بالفتره الاخيره درجت موضة الفساتين الجدا قصيره كنها بلايز وصار صعب انلاقي فساتين خاصه طوال القامه >>>
ومع هالفساتين درجة موضة الكولونات والي حدث ولاحرج
كنا سابقا نرتديها لاجل الستر والآن بتعدد انواعها اصبحت عاشقة الزهراء بابي وامي
ترتدي ماهب ودب منها وهذا لايليق بنا كعشاق لمحمد وآل البيت

خاصه هذا الكولون

[IMG][/IMG]

هذا ياخواتي بالعربي عيييييييب عيييب تلبسه البنت ولافي اي طبقه راقيه من الاجانب تلبسه بنت محترمه
فضلا عن امرأه واعيه ومثقفه

وصارت البنات تلبسه بشكل مقرف لاترتديه الا امرأه لزوجها (كاسيات عاريات بالعربي )

الكولون اناقه اذا استخدم بتنسيق جميل وضمن مع ذلك لباس العفه والحشمه اليك

انا معكم لانستطيع اصلا ايجاد فستان مناسب سعره الا قصير ولانجد الآن قصير الا اعلى من نص الفخد
ولهذا اخترعو الكولون
لكن ارتديه كما ترتديه الاميرات واليكم هذا الموضوع

http://www.shamoa.com/vb/showthread.php?t=53558


الحين بجي للاسئله
مارأيك بالموضوع ككل ؟؟رايك حول الموضه الي حاصرتنا بالسوق وغصبتنا على الشراء(واقول ذلك عن تجربه مني حتى لااظلم بنات حواء) ؟؟
الحل بنظرك ؟؟
انتم ايها الآباء والامهات والاخوه والاخوات هل تقبلون على ابنتكم بهذا المنظر دون ردعهم عن ذلك ؟؟

نصيحه منكم لخواتكم

[الكشاف]

أول شي ما عرفت الكولون لأني أجنبي هههههه .. أقصد من خارج القطيف

ثانيا وهو المهم أن القضية تصب في نقطة واحدة وهي أننا مجتمع استهلاكي ولذلك غصب علينا نستهلك ما ينتجونه لنا وما يوزعونه علينا

وهذا لا يختص باللباس بل ينسحب على الطعام أيضا

الآن مثلا فيه ناس لا يفهمون نتائج دفن البحر وعواقبه الوخيمة ... وبعد عقدين أو ثلاثة عقود من الزمان سوف تندثر الثروة السمكية المحلية ويتم استيراد كل شيء من البحار الآسيوية المجاورة لفيتنام وتايلند وذاك الوقت من بيقدر يتشرط أن السمك الحلال لازم يكون فيه فلس ؟؟؟ السمك بتشوفونه بشكل فيليه أو برجر و لا تدرون فيه فلس أو لا !!!

نرجع للكولون وللملابس بشكل عام
الحل هو ( الانتاج المحلي ) والوسائل كثيرة من عمل البنات في بيوتهن إلى تاسيس مشاريع استثمارية وخياطين ( ولو أجانب ) لتصنيع هذه الملابس بالمواصفات المطلوبة . صحيح أن هذه المحخاولات لن تملأ السوق و ل ن تمنع الأنواع المستوردة ولكنها سوف تؤمن نسبة ولو صغيرة بالسوق وسيكون لها من يشتريها . والدليل على ذلك اللحم بأمريكا مثلا مع أن أغلبية الناس ما يدققون ولكن فيه نسبة من لحوم الكوشر ( لليهود) والخلال للمسلمين ، وكذلك الملابس هناك نسبة في السوق لكبار الحجم وهكذا ... لا نفكر بعقلية ( إما كل السوق أو لا ) بل بعقلية ( لولا اختلاف الأذواق لبارات السلع ) وهناك بالتأكيد من يرغب في الستر والفضيلة .

موفقين

[ياوديعة علي]

هلا وغلا اخي الكشاف

هذا الي انسميه هلاهوب اخوي

اما عن الاقتراح الي ذكرته موجود لكن التصاميم والخامات رديئه ومتوفر بجميع المجمعات فساتين للمشاغل
من جهتي افضل الجاهز على فستان من مشغل لانه مواكب للموضه لكن مع الاسف الجاهز لايراعي عرف ولاتقاليد
الا اللهم بعض الماركات العربيه واسعارها لابئس بها تقريبا
اني معك بانهم يشتغلو ويجتهدو لانتاج ملابس راقيه وتناسب العرف والدين
لكن المشكله بالغلاء اولا وثانيا ردائة التصنيع
وهذا الي مخلي شغلهم في تراجع
وحاليا انتشرت مشاغل تقلد فساتين الماركات العالميه تقليد جيد الى جيد جدا
لكن تعرف شي اخي الكشاف ماانتشرت عندنا الشيعه واحنا الي بالغالب نشتري ماينتجه الغرب
اعطيك مثال من ارض الواقع وقدامي صار مرتين

كنت اتسوق باحد المحلات وجيت اشتري بلوزه كم وكم زي زوجة طرزان على قولتهم
ووقفت جنبي بنت ظلت تقلب فيها وعاجبتنها ولما جت امها قالت لها كيف بتلبسينها وكتفك الثاني عاري وتركتها البنت عن اقتناع
ورحت جهه ثانيه من المحل وبنظري كانت البدله ساتره وعليها قميص دانتيل
هم الام رفضت لانه الدانتيل شفاف
طبعا ماكانت منا وفينا
ومره بالخنيزي هم ماهي منا وفينا وكانت تقلب بالفساتين وبالاخير قالت لللبياع
وكان احد المحلات الي يبيع للمشاغل
قالت
كل فساتينك صارت عندي وانته تقول جديد وجديد ماغير تشيل ورده وتحط شريطه
وهذا واقع السوق عندنا

[وقفة الم]

بات الكولون شي ضروري خيه بس زي ماتفضلتي
لازم اختار النوع اللي يتناسب لغرض الشراء
انا شريته عشان استر جزء كبير الثوب عجز عن ستره
تصدقين خيوه الكولون لمشقق اللي حاطتنه بنتي اول العام بالروضه عندها واحد مثله
عادأنا اول البسها كولون من تحت وبعدين البسها هالمخرم فوقه وهي قالت لي ومعصبه يماه قاموا يتلعبونىعليه البنات يقولون هيلاهوبش مشقق
كسرت خاطري مسكينه
وحنا لما نروح هالعروس تالي شوفي كل وحده طولها تقولي ناطحة سحاب ولابسه هالكولون لمخرم لويه لابستنه ماتدرين
اصلا شكله ويع ويعطيني انطباع مو زين عن اللي لابستنه
بالعربي ماتفرق عندي عن بنات الليل واسمحوا لي على التشبيه
يعني انا خيوه لما أجي بلبس شي من اللي يجبرني عليه السوق ماخليه يتحكم فيني لازم ادور له دبره منيه منيه بحيث مايفقد اناقته
بس اطلع قدام الاوادم كاسيه عاريه لا لا لا لا

[ياوديعة علي]

اهلا وسهلا وقفة الم
صدقتي السوق مو جابرنه لانه في حلول في فترة طلعت موضة الضاغط ولبسناه وانسترنا وكان حل والحين الكولون بس لازم نراعي الذوق والحشمه
ومثل ماتفظلتي ليس بمجتمعنا فقط تؤخذ هذه النظره عن الي تلبسه حتى المجتمعات الغربيه الي انتجته
وصدق او لاتصدق بعض الافلام الزوجه او الحبيبه عندهم تستحي تلبسه لزوجها او حبيبها
واحنا مع الاسف بناتنا الله يهديهم
تقليد اعمى وغير حظاري مطلقا
سلمتي لحظورك وقفة الم

[رسالة حب]

بالعربي مااحبه
لان قبيح ويذكرني بـ .... استغفر الله
ومع هذا يلبسوووه
والناس اذواق احنا اللي مايعجبنا غيرنا يمموت فييه ويعشقه بعد
تقبلي مروري

[روح الربيع]

السلام عليكم..

موضوع جميل لان هدفه الوعي الفكري والايماني ..

نجي للاسئلة .
مارأيك بالموضوع ككل ؟؟رايك حول الموضه الي حاصرتنا بالسوق وغصبتنا على الشراء(واقول ذلك عن تجربه مني حتى لااظلم بنات حواء) ؟؟
الحل بنظرك ؟؟
الموضع بداية جذاب بنوعيه الفكرة المطروحة وجديتها ..
الموضه
توجد لدي قاعده مهمة
البس ما يناسبني كشخصية او بعبارة اخرى
أخذ من الموضة ما يناسبني فقط ...
الموضة ما تجبرني اخذ شئ ما يليق بي او بشخصيتي .. يوجد محلات كثيرة تتناسب مع اذواق العامة ولا تنحصر بذوق معين ..



انتم ايها الآباء والامهات والاخوه والاخوات هل تقبلون على ابنتكم بهذا المنظر دون ردعهم عن ذلك ؟؟
الرقابة في اللبس امر مهم
من قبل الوالدين ..
وتعزيز الفتاة انها تملك شخصية واعية تعمل على إدارتها بشكل نافع
تحياتي

[ياوديعة علي]

اهلا وسهلا رساله وروح نورتو الصفحه
اختي رساله مهما عشقنا من امور الا انها تحتاج الى توجيه وتوعيه للطرف الآخر

مر علي موقف بحياتي ام البنت شكرتني عليه
بداك الزمن الي تلبس شورت او قصير بالعرس ياكلو وجه امها وتصير حجوه ببوز الناس
المهم البنت هدي كانت تبي تلبس شورت وحاولت امها تقنعها مافي فايده وفلان وفلان مافي فايده
بالاخير اخدتها لحالنا وسولفت اياها
قلت لها مو انتي حابه تدخلي الكل يطلع يقول من الجميله الي دخلت دي
وكل مجتمع اله اسلوب بالاناقه والجمال لو غيرتيه بهواك والي تحبيه بتصيري شاذه بينهم
مثلا مجتمعنا نلبس المنفوش والتساريح والشعر صارخ مانقدر بامريكا مثلا نحظر حفل كدا
لازم انراعي الذوق العام حتى نطلع من الحفل الكل يقول من هالقمر وطالع القمر على قول الغنايه
وهذا الكولون خاصه محتاجه النساء للتوجيه فيه انه لايليق باي سيده من مجتمع راقي وباي بلد
لاترتديه الا زي ما الكل متصور
يعني بالعربي مايناسب الا الزوجه
اهلا وسهلا بكم وسامحونا على الهدره

[أحلآهم أتحدآهم]

هلا خيووهـ

كنت متابعة من البداية بصمت والحين حبيت اعلق اسمحوا ليي لو هدرت واجد ..

رأيي ويمكن أني ماحب أي أحد يدخل بلبسي واذا شيء عجبني ومقتنعه فيه يناسبني اخذته اخذته وماعتقد ان الموجود بالسوق يجبرني على أني آخذهـ

أول شيء من ناحية الفساتين القصيرة معاك , أهي الدارجة أكثر شيء بهالايام وزي ماقلتي بسعر مناسب .. وبرايي تناسب طوال القامة أكثر

وبالنسبة للكولون معاكم بكل الي قلتوهـ

لكنها مو ححلوهـ بصيغة الجمع وهالشيء عيب !!!!

بنت غير محترمة ,, بنات لليل ,, وللمتزوجة فقط !!!

لوكانت للمتزوجة فقط " لكانت انباعت بأمكان ثانيه

;)

مثلاً أني أضطريت وأخذته ليي مره وحده بحياتي الكولون اللحمي "" مع اني مالبسته ""لآنه يزحلق مع الجزمة

يختلف من وحدهـ لوحدهـ غرض لبسهاا

"" ستر وحشمه " أو "" أخفاء عيوب ""

أوحتى المشقق على قولتكم < أنها تلبسه على فستان طوله مناسب "

مايعني انها تقلد على عماية وأنها ماعندها رقيب أو أنهاا ماتقدي بأهل البيت و أنها جاهلة بدينهاا !!

صحيح البعض يستغله بشكل خطأ زي ماقلتي كانها لابسه تشيرت بس "" وحتى القعدة ماهي عارفه تقعد .

في النهاية أهي ماطلعت الا شايفه حالها بالمراياا

غير كذا أي لبس واي فستان واي شورت تختلف من وحدهـ لو حدهـ ثانيه حتى لو كان نفس المقاس < فهمتيني !!

تقبلي مروري ..

[وقفة الم]

احلاهم واتحداهم
قلتي جمله حبيت اعطي رايي فيها
لو كان للمتزوجات فقط لكن انباع بمكان ثان
ما اتفق معاش بهالنقطه
لان التجار اخر همهم مراعاه الحشمه
والجمال
بل العكس صحيح
هم يحاولون تشويه الجمال الحقيقي
في كل أمورنا
ابتداءا من افلام الكرتون ونهاية بملبسنا ومأكلنا
تقبلي رأيي
ودمت بحفظ الباري

[قيثارة العشاق]

السلام عليكم

فيه شي ابغاكم تفسرووا لي
يعني الحين البنت اللي تلبس الكولون المخرم تكون كأنها بنت ليل!!وغير محترمة!!
طيب عيييب الوحده تلبس الكولون!!!
اني وحده البسه عشان يكوون الشكل أرتب وأستر
مو عشان شي ثاني
وأول مره اسمع إنه عيب وماتلبسه الا المتزوجة
ولابعمري سمعت إن اللي تلبسه تكون غير محترمة

وفضلاً وليس أمراً اذا حبيتووا تنتقدووا شي حطوووا كلمة بعض
عشان ماتظلموووا الكل

[ياوديعة علي]

ياقيثاره ياعمري ياروحي يااختي الصغيره مو حلو وبكل مجتمع راقي من اي ديانه لايقبله
وهذا توجيه منا لكم لمحبه مو فقط انتقاد ولاكان ماكتبت الموضوع لتوجيهكم

صدقتي وقفة الم لانه بالاسواق المتنقله تنباع اشياء يستحي زوجي اروح اوقف جنبه حتى اشتري لايطلع احد يعرفه
يعني بشكل عام فيه اشياء مو مناسبه يشوفها طفل وهم تنباع

نورتو خواتي الموضوع

[أحلآهم أتحدآهم]

خواتي االموضوع ( بالزواجات )
حريم x حريم
وش دخل المتزوجاات !!
أني أول مرهـ أسمع ماحد يتقبله ولآ ديانه تتقبله اشوف الطبقات الراقيه هي الي تبلبسه وترى شيء مو حرام
اشوف الأصدقاء والاهل والاقارب الككل يستخدمة
تراها مجرد جوارب نسائيه ولآ تعني انها صنعت لتكون كذلك فأول من اخترعها ماخطر بباله انها تكون مثيرة ..
لو كان الكل يفكر بذا التفكير ماكانت الأم الي تاخذه لأبنتها بأبتدائي ..

بعد بتشبهها ببنات الليل

فمثلاً النسوان الكبار لما يطلعوا يلبسوا جورب بيج الكل يعرفه صح !!
وش الغرض منه !! (( الستر ))
وعلى فكرة هو ماينباع بس بالاسواق العامة
ولآ الي بتلبسه في زواج مابتاخذه من الاسواق العامة
أقل سعر له بـ 35 وطالع
حتى سيتي مول القطيف فيه محل خاص بالجوارب ههههههههه
>> ملاحظة : لآيجوز شرعاً قذف المحصناات

[romanticrose]

بسمهِ تعالى ..
أولا : مبارك عليكم الشهر الفضيل و كل عام و أنتم بخير ..
ثانيا : موضوع رااائع وديعتنا و أعذروني على وجهة نظري ..

..
1 / التوجيه و النصيحة و الأمر بالمعروف و النهي عن المنكر
يأتي بصيغة محببة لا منفرة و لذلك كلمات مثل " بنات الليل ، و حرام .. الخ "
لن تجدي نفعًا و إنما إستخدام ألفاظ ألطف بقليل مثل " منافٍ للحشمة " مثلا
أجده أخف وطئًا ..

2 / أيهما أفضل ؟!
لبس العاري أعني " عاري الكتفين و الصدر " و الفستان طويل !
أم
قصير و شبه محتشم ؟؟!
لنكن واقعيات لمرة واحدة :
كم مرة دخلنا و حضرنا أعراس تكون الأم أكثر تفسخًا من ابنتها ؟!
إن كانت هي زوجة أليس زوجها أحق بهذا من الناس ؟؟!
نقطة ثانية أيضًا
لو نصحتي لو تكلمتي ما العبارة الأولى التي سوف تلقينها منهن ؟!
" البنت توها في بداية حياتها ليش نحرمها " ؟؟!
لأنهم فاهمين الموضوع خطأ لأن إذا خلوها مُتفسخة يحافظوا على عدم حرمانها !!!!!ذ
نقطة ثالثة :
الشي الي راح نواجهه أيضا كلمة مُعتادة :
" داني في البيت محتشمة و لابسة المشمر ، ويش فيها
لا رحت المعاريس و نفهت عن روحي ؟؟ " !!!
..
الي حابة أوصل له :
مو كل بنت طلعت بهذا اللبس معناته هي غير محترمة إنما خالفت
الحشمة الموصى بها
و مو شرط أني مو عاجبني هالشي أقول عن الناسات الثانية هم كذا و كذا
هي في الأخير حُريات شخصية و نظرة للأمور
و الي يبغى يحتشم يعرف و الي يبغى الشي الثاني يعرف
في النهاية هي على التربية و على الأم في الأساس ..
و اللهم إجعل عواقب أمورنا خيرًا ..
..

وديعة علي ..
اسمحي ليي موضوعش فتَّـــــــــــــاك و على الجرح

[قيثارة العشاق]

أختي ياوديعة علي
اني ماأمنع أحد من إنه ينتقد شي أني أسويه أو ألبسه لأن الناس أذواق
لكن بنفس الوقت مااسمح لأحد يسبني ويطلعني مو راقية وكأني بنت ليل
والله إني حسيت شوي وتكفرووني لأني ألبسه
وأتووقع المفرووض لما الشخص ينتقد شي مايشتم الطرف الثاني
لأن اتوقع مو حلووه أبداً تشككووا بأدب وتربية وأخلاق اللي يلبسووه وتشبهووهم ببنات الليل
ولو إن مااحد يقبله ماكان باعووه من الاساس