أنا وأمي العوده والقدو

[فتى تاروت]

[ALIGN=JUSTIFY]بسم الله الرحمن الرحيم

هذه المادة حقيقية 100% ... والأسماء الموجودة في الموضوع أسماء وهمية لشخصيات حقيقة ... جميع الحقوق محفوظة لـ فتى تاروت

هذا الموضوع عبارة عن نقاش حقيقي بيني وبين جدتي .. لسبر أغوار الحقيقة ... والخروج عن المألوف والمعتاد في منتديات الحوار

المكان : تاروت المقدسه - الدشه - بيت أبويي العود

الساعة : 1 ظهراً

اليوم : الجمعة

+++++++++++++++ في الصــــــــــالة +++++++++++++++

الجو هادئ نوعاً ما ولا يوجد ضجيج .. الكراج قريب من الصالة وسيارة المشرف العام موجودة فيه ... الأمور على ما يرام ولكن هناك صوت متقطع ... يعلو أحياناً .. وينخفض في أحيان أخرى .. وصوت المسجل عالي .. نعم إنه الوائلي وهذا هو صوته المميز ولكن ماذا عن الصوت الآخر .. هذا الصوت ليس بغريب علي فلطالما سمعته مراراً وتكراراً .. ما هو يا ترى هذا الصوت الذي ينبعث من الصالة ؟؟ آه ... ههههه إنه صوت شخير جدتي كالعادة ... ما إن دخلت وأحدثت بعض الضجيج وإذا بجدتي الغالية تصحو من نومها

أمي العودة : منهو ... محمد ... تفضل يا غناتي ... شحاولك ... ما تنشاف يا ولدي وش هالغبه

أنا: الحمد لله ( امووووووح ... قبلة على رأسها كالعادة ) أنا تمام أنتي وش أخبارك ... وش إنسوي بعد تعرفي هالكلية النحيسه دوام للعصر ما أقدر أبلع ريقي

أمي العودة : يو .. ولاويش للعصر عاد يا ولدي مو زي المدرسه لظهر وأنتون راجعين

أنا: لا غير ... شكلي قعدتش من نومش ... خلاص أنا بروح لعمي أسلم عليه وبرجع لش بعد شويه

أمي العودة : لا تعال هداني قعدت .. وش ماخذين من نومت لظهر ما وراها إلا اتكسر الظهور .. دقيقة خليني أجيب لك جدوع

أنا: ما يحتاج أمايي العوده إدا بغيت باقوم آخذ ليي من الفلاجة أنتي بس قعدي من زمان ما شفتش أبغى أقعد وياش ..

أمي العودة : ايه .. راحت أيام لول يا ولدي يوم كنت أسبحك في داك الحمام من الصبح أيام البرد بداك الماي الحار .. كأنك شمعه وأنت بتروح الروضه

أنا: هههههه ذكرتيني أمايي العوده .. أتذكر فركتي ظهري بالزور ( بقوة يعني )

أمي العودة : هههههه ايه حتى اتظكر اتقول ليي شوي شوي أنا مو صفريه تفركيني بليفه

أنا: ها أمايي العوده .. شكلش بعدش ما تشربي القدو .. أقوم أحط لش الفحم وأبكر القدو .. ويش ؟

أمي العودة : يو ... ظكرتني هداهو راسي داير ومتسودنه ماني قادره .. كان أفادي في مزتين غليون

أنا: عادي ألحين أسويه لش دقيقة بس

أمي العودة : لا يا ولدي هداكي الخدامة قاعده في المطبخ طول إنهارها وهي تاكل من ديك الفلاجة وأني أقول من ويش اتخلص الخضرة بسرعه .. طلع طايحة الحظ اتركبه وياها في غرفتها .. ايه لازم ما تسوي حاجة إلا بكروتها أخليها أتقوم أتبكر القدو ألحين ... نور يو !! سلمى .. !! وش أسمها هالنحيسه .... فترينا ... سوي القدو

الخدامة : زين ماما

أمي العودة : وهداكو التتن محطوط برى صوب المنقله بكري القدو عدل وأخذي القلم الأخضر وغسليه غسالٍ زين وأهو بسرعه لا تتأخري عليي ترى راسي داير وماني قادره

أنا : أمايي العودة كم صار لش تشربي قدو .. قولي لينا سالفتش ويا هالقدو ؟

أمي العوده : يا ولدي هالقدو النحيس شربته على أيام ما فهمت للعزايا والقداوه .. ويا نجاحوه وبت جليح عساها السعادة كل إشوي ومدت ليي القلم وقالت اشربي ترى زين عن عوار الراس .. وأني يا ولدي داك اليوم راسي يعورني .. ايه وجربت شربت داك الغليون وإلا الدنيا صايره شعرور وداخ راسي واتسندرت على الطوف وجابو ليي كاس ماي .. عاد قاموا النسوان يتضحكوا علي .. ايه وصرت كل يوم في عزيت بيت الأسود أشرب ليي مزتين وليومك هداني أشرب يا ولدي

أنا : ايه بس أمايي العوده يقولوا يجيب السرطان ويمرض !!

أمي العودة : وأنت يا ولدي كل شي يقولوه لك اتصدق .. هداني صار ليي اسنين وابنين يا ولدي وأني أشرب ما شفت جاني شي هادا وأني ما أشرب غليون زي النسوان ... لو اتشوف مرت حجي علي أم هذاك وش اسمه .. الله يلعن الشيطان .. ايه ام منى أني أستغرب في هالنسوان كل يوم ومسمين لينا بناتهم بأسامي غير شكل ولا يا ولدي مره ضبعه متفتقه براغيها ماهي قادره تتكلم اسمها منى ولا رشى ... إحنا إدا بغينا إنسمي بناتنا سميناهم خاتون ، فاطمة ، زينب ، زهرة ، عفاف هادي الأسامي الي ترد الجنان يا ولدي مو أسامي ما أدري من وين يطلعوها ... ايه عاد أقول لك عن مرت حجي علي ... هادي يا ولدي أتنام ويا الغليون وتقعد ويا الغليون .. أقول لك رحت ليها يوم بيتها بأعطيها مشمرين موصييني أوصلهم ليها .. أيه وأروح ليها إلا هي في داك الحمام أتراوب الفياب وقلم القدو في بوزها ... أقول ليها فلانه ما فيه حزه ما شفتك تشربي فيها قدو ... انتبهي لصحتك .. ايه وقالت ليي يو أني ما أشرب القدو إلا خمس مرات بس في اليوم ... مو زي صفيه تشرب بالسبع مرات ... شفت يا ولدي حتى أتقول مرت حجي علي إنها تحلم ساعات إنها تبكر القدو ... أني ما أصدقهم !!!

أنا : زين ولاويش اشتريتي هالقداوه الواجد قدو واحد ايكفيش ؟

أمي العودة : هذا ديك السنة يا ولدي يوم أبوك أخذ أمك قلنا بنسوي عاده في البيت ايه وقالت أمك ما يحتاج مرت عمي اتجيبي ملايه أني أقرى لش في البيت .. ايه وأنت تعرف العزيه يبغى ليها كروه من عند أبوك العود عشان نصرف عليها والعزيه الي ما فيها قداومه النسوان ما إيجوا ليها ... اشترى أبوك العود الله يرحمه فلتعشر قدو وبعدين أني أشتريت سبعه من سوق الفنين كانوا إيبيعو اللول ودورت ليي وحده اتجيب ليي تتن وقصصنا قواطي الجبن الي نشتريه واشترينا إقلامه ولزلاق من عند سعيدوه وسوينا القداوه

أنا : وجوكم نسوان يتسمعوا ؟

أمي العودة : ايه .. كيف ما يجوا يا ولدي ما دام فيها قدو .. ولا عاد أم زكي ما يبغى لها توصيه على طول قلت ليها بس بنسوي عادة في البيت يوم الفنين ليلة الفلافة وإلا أتجيك ديك المستمعه من كل مكان شعرور يا ولدي ما عرفنا وين انقعدهم من الزحمه ايه وصارت اعويدت الخير كل ليلة فلافه نقرى في البيت

أنا : أبويي العود كان ما يرد لش طلب ؟

أمي العودة : ايه .. أبوك العود الله يرحمه كان طيب حتى اتضكر يوم أخذته وإحنا صغار ما نفهم للزواج يا ولدي وش فهمنا .. حتى اتضكر ألعب وياه أكنيس فوق الصدح في عز الظهر مو أنتون أولاد اليوم الواحد يطلع الشيب في شعره وهو توه خاطب ... أمحق زمن ايه دنيا خرم برم

أنا : عجعل أمايي العوده لو أنا في زمن اللول كان خاطب ألحين ؟

أمي العودة : يو يا ولدي كان من زمان ألحين مرتك حامل في الشهر التاسع بعد ( بل حللتها أمي العودة وحسبت الشهور بعد )

أنا : ناااااااا يعني كان أنا بعد شهور أصير أبو ؟

أمي العودة : أيه أنت وشطارتك فيه ناس تحبل مرته من أول ليلة وناس يقعدوا بالسنين إيحوم إفادهم على داك الولد ( أمي العودة جريئة )

أنا : إلا صحيح بقول لش وش صاير في الفريق عفر ؟

أمي العودة : يو ما دريت له العالم كلها درت ... هداكو حسانوه ولد حميده ضرب الهندي الي إيبيع في بقالة سعيدوه بحطبه شلخ راسه حتى الدمان سالت من على وجهه

أنا : بل .. ليش ؟

أمي العودة : وش دراني عن هالمصبنه ( صبيان يعني ) كل يوم ومسوين لينا حاجة .. هداكم يقبعوا من البمبره الي في البيت ... أقول ليهم إدا تبغوا لايمت ليكم سلة بس مو أتقبعو الأخضر بعده ما يستوي ولا يقبعوا ليي البغاريف من القضب بعده ابسر .. كيفا ياكلوه يا ولدي أني ما أدري يجيهم ريح في بطنهم ... أتقول فيران مو أودام .. آفة يا دافع البلا ما أطلع إلا البغاريف مقرضه اتقرض ومفلوته عند الباب .. هدي حاله بالله عليك راحت أيام اللول يوم ديك السدره هالحلاوه الي عليها نقعد أني وأبوك العود في فيتها ( ظلها يعني ) وناكل داك البمبر ونشرب لينا أستيكانتين شاي وأقوم أروح العزيه وأبوك العود يروح السوق يقعد ويا هالشياب

أنا : أمايي العودة منهو الي معرس البارحه ؟

أمي العودة : هادي جنان بنت حجي محمد ماخذه واحد من صفوى ... أني كنت أبغاها لعمك من زمان بس طارت الطيور بأرزاقها أني قايله لعمك بس عمك هدا ملول كله يقول بعدين بعدين ... ما أدري وش فيه هالولد ... كل ما أرفع السماعة أبغى أتصل في خالتك سمعت لتوشوش مال هالتلفون وإدا رفعته يستحرق وإيقول منهو الي رفع السماعة انقطع عندي فوق .. دقول أنت بتدخل الانترنط إحصاره الواحد يتوهق يا دافع البلا إدا بغى يكلم تلفون

أمي العودة : يالله يا فترينا ما أستوى هالقدو له ... حصاره لو أبغى أبكر القداوه لها للمستمعه من زمان خلصت

الخدامة : خلاص ماما .. هدا قدو وهادا قلم أخزر أنا غسلي

أمي العودة : فترينوه ... كم عمرش ؟

الخدامة : عشرة عشرة خمسه

أمي العودة : يعني 25 عدل يا ولدي له ؟

أنا : إيه عدل أمايي العودة

أمي العودة : متزوجه لو بعدش ؟ فيه رجل في اندونيسيا ؟

الخدامة : ما في ماما

أمي العودة : وش رايش نخطبش إلى عدنان ولد أم جهاد .. مسكين بهيمت الله تاخذيه وتكسبي فيه أجر

الخدامة : لا ماما .. لا ماما .. أنا معلوم هذا عدنان مخه خربان

أمي العودة : أيه يا بنتي قلت لش بهيمة الله .. تاخذيه وإنحطكم في شقة صوب بيت أخوه .. وعيشي وياه

الخدامة : لا ماما .. أنا ما يبغى خلي ولي

أمي العودة : خخخخ على كيفش يا بنتي انتين الخسرانه هالحلاوه الي عليه

أنا : هههههههههه ... أمايي العودة صايره خطابه ... أشوف تبغي اتزوجي الخدامة

أمي العودة : ايه أضمن يا ولدي .. المرة إدا اتزوجت عقلت وأكبر مخها .. على الأقل إيصير عندها رجال بدل ما هي مقابله الفلاجة 24 ساعة طايحه في الخضره حطام فيها يا دافع البلا

أنا : أمايي العودة .. بروح أسلم علي عمي وبعدين بروح البيت عندي شغلانه

أمي العوده : أقعد يا ولدي تو الناس

أنا : اتأخرت أجي ليش مره فانيه

أمي العوده : زين يا ولدي سلم على أمك وأبوك وأخوتك .. وسلم على خدامتكم بعد قول ليها اتسلم عليش ماما ولا تنسى أتقول إلى أمك تتصل فيني عشان الفاتحه الي في المشاري بنروح ليها وفات بت خزعل ... وقول إلى أبوك هداوه حجي يوسف إيسلم عليه ويسأل عنه إيقول ما يشوفه إلا في المسجد يوم الجمعة ... ولا تنسى أتقول لخواتك يبرزوا حوايجهم عشان روحت المدينة إسبوع الجاي ويا عماتهم

أنا : إن شاء الله أمايي العودة مع السلامة

انتهى .. فتى تاروت يحييكم [/ALIGN]

[القلم المتأمل]

خوش ، خوش
حلوة ويا أمك العوده ، زين منك اتروح اتسلم عليها ، لان شباب هاليوم ما يدري عن أهله ، بس يكشخ في كشته ، وين الجل وين المسخره ، وين المجمعات ، وما يدري عنده أهل لو لا ..
بسألك كدو يدتك من وينه .. لايكون من مصنع الفخار إللي تشتري منه أمي ، أحنا بعد هالنسوان يوم الخميس عزيتهم ، وتعال شوف هالحالة ( برابق القدو ) اموصله الشارع ،، لا وكلهم يتكلمون في مرة وحدة أقول لأمي منه يسمع الثاني كلهم ور ،، ور ، ور ،، ويلاه منهم ..

حتى واحد في سنابس البحرين اقول لي : سويت في نسوان صديقات أمي مقلب ، ،،اشلون : قال : طلبت من أمي أبكر ليها لقداوة ، وأسوي ليها الشاي للعتمة ، عاد املليني من هالسوالف إللي جنها سفّه ماتنتهي .. قالت : يوه حميدوه بسوي الشاي ويبكر الكداوه؟؟ عسى عمرك طويل ياوليدي .. راح حميدوه ودور الفلين مال مغاطي البيبسي ، وذاك الفلين عاد ما لول مهو مال الحين وبعد ما ترس ليه كيس حط ويا الشاي جف واحد من ذاك الفلين ، وجوك النسوان ، ويش احوالكم يام حميد ،، حياش الله يابويي حياش دخلي ،، بدأت السهرة ، وحميده جالس في غرفته يسمع حجيهم ، وامي ادور بالقداوه واتصب الشاي ، بس من شربوا الشاي إلا ايقولون لأمي اليوم يام حميد طعم الشاي متغير ، قالت ليهم لان اليوم طويل العمر حميدوه هو إللي مسوينه ، يوه مسوينه ؟؟، طول الله عمره .. المهم جلسوا في سوالفهم ، وإلا يسمع وحده بتروح البيت اتقول بطنها منتفخ عليها ،ـ قالت الثانية اما أني ساكته ولا اكدر اتحرك من مكاني ، ردت الثالثة يعني انتون اتحسون مثل ما أنا احس ،، يوه ، ويش صاير ، نسو إن حميدوه مخلي لهيم ذاك الفالين ، لا كامو يتسحبو وحدة وراى الثانية ، وأمي اتقول ويش فيكم الليلة بتخلوني ابروحي ، ويش ماكلين ، أما حميدوه طب على سريره منفتك من الضحك إللي وصل إلى أمه ، دخلت عليه أمه وهو في حالة سكر من الضحك ،، يوه ، يوه ويش ايضحكك؟؟ عفر ويش امخلي لينا في الشاي ، راحت سيده إلى المطبخ وكشفت على الشاي ، رجعت بسرعه حميدوه ياسود الوجه جديه اتسوي فينه ، فشلتنا ، فضحتنا ، الناس إللين دريو ويش بيقولون ، لكن ما أدعي عليك إلا بحرة جبدي ،وبطني لمشعلل ...

[نهروان]

[ALIGN=CENTER]السلام عليكم

اخي الكريم فتى تاروت بصراحة ابدعت في كتابة هذا الموضوع

الله يخلي الك امك العودة ويطول بعمرها

ترى صحيح السموعة الا مافيها قدوا النسوان مايروحون ليها والله حالة .

ومثل ماقال الاخ القلم المتأمل ان شباب هاليوم زين منهم اذا راحوا

سلموا على أمهم العودة أو أهلهم .

أختكم نهروان [/ALIGN]

[باب العين]

مرحبا مرحبا مرحبا

مايحتاج اقول ان فتى تاروت أبدع وجاب لينا شي جديد في هاذي التمثيلية الشعبية مع جدته الله يخليها ويخليه ليها ذخر .

أما أنا يا فتى تاروت أكره الدخان ولا أشتهي ريحته من يوم أنا صغير, حتى ساعات تزعل عليي امي وفي مرة من المرات كسر ليها قدو .

لكن القدو قاهرني وين ما أروح حتى في البحر

في مرة من المرات كنا نحدق في خور دارين ، واصيد شي فقيل قلت انا اوه يمكن هذا هامور أو سبيطي

واسحب فيه واسحب وانا خايف تنقص الجلة أو ينحاش كان يطلع قدو

[عام-1]

سوالفكم حليوه ياجماعة الخير .. وش رايكم لو تفتحوا لينا ديوانيه هنيه

[أم حُسين]

أقول يا فتى تاروت..
سلم على امك العودة و قول ليها تهون عن القدو لأن ما وراه إلا الأدى و الكحه..
الله يطول في عمرها يا رب..

[فتى تاروت]

بسم الله الرحمن الرحيم

السلام عليكم ورحمة الله وبركاته

القلم المتأمل

حركات والله ،،، طلعت لأصحابك ذكريات ويا القدو .. القدو مادة فكاهية غنية لكن ما حد عارف ليها :)

نهروان

وعليكم السلام ورحمة الله وبركاته .. شكراً جزيلاً لمرورك من هنا وأتمنى أن تكوني قد استمتعي بقراءة الموضوع وإن كان طويلاً جداً

باب العين

هلا والله بـ " باب العين " ... وينك يا رجال ما تنشاف .. منخش هالكم يوم ... تدري أن سوالفك تعجبني .. وش رايك نسوي لك كتاب التأليف عليك والتوزيع عليي والأرباح ففتي ففتي %

عام-1

هذا القدو وما يسوي .. ترى كثير من الناس تستهين بالقدو .. شرط لو يسووا دعاية للتتن في قناة mbc كان طلعوا مليارات

ريمي

الله يسلمك يا ريمي .. يوصل إن شاء الله .. وبالنسبة للقدو خلاص يا ريمي أمي العودة أدمنت على القدو ومستحيل تتركه .. على قولتها لو بتركه كان من زمان تركته يا ولدي .. لكن ألحين خلاص ما إفيد

فتى تاروت

[باب العين]

مرحبا أهلا وسهلا بلك فتى تاروت وكل المشاركين اللي يحبوا التراث

ويش فتى تاروت خلصت الاختبارات لو بعد ؟


هذي طرفة بعد حصلت لشخص من بياعي التتن في تاروت .

هذا الشخص يروح عمان على شان يشتري التتن من مزارع عمان ، وهو يأخذ نماذج أو أنواع من التتن , وفي مرة من المرات جاب معاه نوعية ولا زالت النبتتة خضراء .

جاء المسكين جوعان ودخل المطبخ على طول وحط أوراق التتن الاخضر على طاولة المطبخ .

تدري ويش صار بعد ما طلع من المطبخ ؟

جاو أهله واخدوا أوراق التتن وغسلوه وقطعوه وسووه سلاطة ، لا زلت أضحك من هالوقعة --- ههههه

[فتى تاروت]

أهلاً وسهلاً أخوي باب العين ... لا والله ما خلصت اختبارات وأنا أرد عليك ألحين وأنا لازم أقوم أذاكر ... لكن قريب إن شاء الله ويا شباب الثانوية

بالنسبة للقصه وش أقول ... مو قادر من الضحك

الصراحة .. مقلب رهيب جداً .... هههه ما يتكرر كثير

فتى تاروت

[نجمة تاروت]

مرحبا

ها ابو القدواة فتى تاروت

ما شاء الله عليك خوش قصة بصراحة أبدعت فيها

اه لاحت ذكريات لاول وياليتها اتعود كان انحصل لينا صفقة قلم بس يا حلوها من صفقة

كنت اذا ما طاوعت امي تستحرق واتقوم تلحقني ابقلم القدو

[فتى تاروت]

هلا والله بأبو القلامه نجمة تاروت ... ترى ضربة القلم مميزه والدليل

أنها تطبع وأثرها يظل موجود ... :)

ياما حصلنا لنا ضربات ... لكن ضرب الحبيب مثل أكل الزبيب

[نجمة تاروت]

مرحبا

ايه صدقت يا فتى تاروت الله على ايام لاول بصدق اقولها حسافه عليها

اتمنى يرجع لو يوم واحد وقابل احصل سطرة اقلامة على ظهري مو قلم موافق
وبعد احصل ليي شدخة قدوا على راسي هم اموافق
ولو احصل ضربة بكار على وجهي هم اموافق
ولو احصل ضربة بالباقدير هم اموافق
ولو احصل ضربة بالمام هم اموافق
ولو احصل شدخة فوق راسي بفحمة حارة هم اموافق
ولو يلوتي التتن على خشمي هم اموافق
بس يرجع يوم واحد من ذيك لايام الحلوة

اخوك نجمة تاروت

[فتى تاروت]

السلام عليكم ورحمة الله وبركاته

الله يخلي أمي العودة أم علي :)

[ميثاق]

اخي فتى تاروت
امتعتنا كثيرا بتلك المحادثة الرائعة بينك وبين امك العودة (ربي يحفضها ويخليها لك)..
لاتنسى ان توصل سلامي لها ..
تحياتي
ميثاق

[شروفه]

تعيش ام علي تعيش تعيش


يسقط القدو (( لدواعى صحيه )) يسقط يسقط



** سامحيني ياأم علي