بمبرة الگصر

[المتدقدق]

صبحكم الله بالخير

حجي مكي من سلمان (المدگدگ) و مرته ام جعفر (شواخ بت حجي مرهون) وياهم ولد ولدهم مكدادوه في العشه...أم جعفر گاعده اتمرگ السيويه و تـگـلي الگـيمات....أبو جعفر گاعد على دوشـگ يفتل حبال....ومكدادوه گاعد صوب جده يطالعه چيف يفتل الحبال....في هذه الأثناء دار هذا الحديث:

يجدي أنا اليوم كنت في بيت عمي باب العين وا سمعته يسولف وي بته نجاحوه عن الـگصر وبمبره في الـگصر و چلام عن الدكريات ما فهمت منه شي...و يـگول هو اتحـچى وياك عنها...وشو هادي الدكريات يجدي؟....مشتاگ واجد واجد أعرفها.

ما عليك منه يبو جعفر, گليل الحيا هادا....منت انوينو ولد البارحه!!!...مو ابعيد اتدش المدرسه وگاعد لينا شلوح من غير هاف....امفشلني وي النسوان في العزيه...وجهي صار هلكبيره يالنحيس...

أفا!!!!....صحيح اللي اتـگوله حبابتك يا نحيس....شوف... الحين أنا باگول لك هادي الدكريات لكن امبعدها اتـگوم تلبس لك هاف..لبسك جني ان شا الله...هادي الدكريات يولدي يمكداد مر عليها اسنين و امنين....دكريات حلوه و دكريات مره, انخلط فيها اللعب بالجد, الضحك بالصريخ...وكتها تاروت يولدي يمكداد جنه من هلجنان....فيها ما تشتهي الأنفس و الفواكه ألوان....وكانت قبلة السواح الأجانب من عنـگريز و امريكان....ومفل ما گال عمك باب العين كان فيه بمبره بحرينيه من جنوب الـگصر ....حتى أضكر أكلنا منها ...طعمها لديديد واجد واجد, لو تاكل زبيل ما شبعت مو مفلات البمبر القطيفي أبو الريري....لو اتاكل فنتين لزگو في نطعك....أدكر بعد ما ماتت هالمبمره خساره, سويناها لينا مرجحانه...مره من المرات گاعدين نتمرجح و من بلاستي و انا اتمرجح هديت المشوغ و گعدت اچفخ و أغني غناية طلال المداح (ياساريه خبريني ياساريه خبريني عما جرى خبريني)...يعني هاد الإيدين .... بشوي و اللا جارناصلحوه من شطانته هزهز الجدع حد دينه و أطير أنا فووووووگ في الجو وجيت امهلب كأني بطه ما تعرف تطير....الله ستر ...و انا امهلب اتشربك هافي في المشوغ و اتدلدل فيه....راسي تحت و رجايلي فوگ كأني نفنوف امك أم جعفر منشور على الحبال....اتخيل ديك الحزه مانا لابس هاف يمكداد, ويش صار فيي؟؟؟!!!!!

شاورمه اميه في الميه طبعن.

دام چديه, يالله عجل گوم البس هافك گمگم عصبك و طاحت اركبك گبل لا اسويك شاورمه.


حرسكم الله مع السلامه