|~| عندكم هـوآيه غريبه ؟؟ محـد يدري عنـهآ؟ دشو وشآركونا |~|

[قطرات حائرة]

صبـآحكم / مسآكم عسل
كلنا عندنا هوآيات
بس هوايه عن هوايه تفرق
و كل شخص عنده طبع خاص فيه واسرار مايحب غيره يتدخل فيها
تعالوو نسوولف عن هالهوايات والاطباع الغريبه الي فيكم
*وطبعا دايما تذكرو كل شي غريب يميزكم عن غيركم

وأكيد راح أبدأ أني

مو تضحكون عاد
عندي هوايه وهي ,, لما أجي أقرأ روايه في جوالي أحب أكون لوحدي طبعاً
أدخل غرفتي واشغل المكيف وانسطح على السرير
واقعد أقرأ في ديك الروايه ,, وعلشان أدش جو بعد ,, أحط السماعات في أذوني
وأسمع لي موسيقى حزينة لما أقرأ مقطع حزين
وموسيقى أكشن لما أقرأ مقطع حماس
ورومانسي لما أقرأ مقطع فيه حب وغرام

ولا ساعات أحمس نفسي وأغصبها وأوقف قرايه عند مقطع يحمس
حدي داخله جو مسلسلات

ويلا الحين دوركم طلعوا المستور

[ام عباس وزينب]

هههههههههه وناسه قراءة الروايات كدا اجل هههههههه
اني وشو عندي هوايه غريبه
اي
اجمع قراطيس الماركات حك الثياب وغرشات كريم الشعر وكريم الوجه المهم كل شي ينفتح غطاه وشكل الطاسه
لو اني في امريكا كان قالو عندي مرض الاكتناز خخخخخخ بس بعد فتره ارميهم واترس اكياسه اكياسه لما ارميهم

[أم أحمد]

جمع الاكيآس
وجمع آغرآش جبن بوك اذا خلص
هههههههههههههههههاي

[ام عباس وزينب]

ام احمد تغطي لاحد يشوفنا طلعت فضايحنا الاميره ههههههههههه

[هاشميات]

هههههههههههههههههههههههه... هلكتبني ام عباس

ويش يسموها دي الهواية لان اني بعد احب أجمعهم ...بس الكروت حق الملابس وبطاقات الزواج واحب اجمع الطوابع والآستكرات الى الحين ..وأسوي روحي أشتريهم للجهال وأخشهم ..خخخخخخخخخخخخ

[هاشميات]

ههههههههه ام عباس اني بعد احب اجمع كروت الملابس واحب اجمع الاستكرات والطوابع والى الحين اشتري واجمع واسوي روحي اشتري للجهال واخشهم ههههههه
واحب اجمع بطاقات الزواج..
ويش يسموها ام عباس هالهوايه ......

[هاشميات]

ويلي من التفاعل والضحك راح الرد مرتيييييييييين

[قطرات حائرة]

ههههه ويلي على هواياتكم
عندي بعد هواية جمع الدفاتر
آموت فيهم
وأحب بعد أجمع الظروف والملفات حتى لو ماعندي سالفه فيهم

[ام عباس وزينب]

هههههههههههههههه نفس الهوايه اكتشفت عندي دفاتر امغبره من سنة الجنانوه

هاشميات يسموها الاجانب مرض نفسي الاكتناز هههههههههههه لايدرو عنا بس خخخخخخخخخ

[الزهراء عشقي]

صباحك ورد~
،
هوايات ولا اروع
/
عندي هوايات غريبه بعض الشىء
بعض الاكسسوارات تكون خربان احب اجمعها من شان اعمال فنيه اسويها لي
واجمع صناديق الجزم وانتم بحرامه وعلب العلاق حق الرجال ههههه واشتري جلاد واغلفهم واسويهم مثل العلب الجاهزه
وواخليهم حق اغراضي
،
واستخدم علب الكبريت ههههه والونهم بالوان متنوعه
وازخرفهم بالفص والترتر الامع
وحط فيهم الخواتيم ههههه ع قدهم
واجمع بعض الاغرش مثل الزموته والمرقدوش
والون الرمل وابيهم داخلهم
بس اعمال فنيه زي مايقولون ههههه
،
ننتظر باقي الاعضاء
،
عزيزتي قطرات
مميزه دائما بطروحاتكِ
رعاكِ ربي~

[..سر وجودي..]

قطرات حائرة فقعتيني من الضحك..

ان بعد اسوي جذيه ..
تخيلت بس اني في الدنيا اللي اسوي كذا.
اقطع الرواية اذا جا حدث مهم اسوي اكشن
حق الحماس خخخخخخخخخخخخ...

اني عندي هواية شراء الاطباق الغريبة والقميلة

احب المواعين حبا جما.. بس مااحب اغسلهم..

اي صحيح بعدني احب الون في دفاتر التلوين.. واحب اشتريهم الى اولادي

[شامبو]

اني عندي هوايه كانت طبعاًً مو الحين
كنت اجمع غرشات العطور اني وصديقتي .. موسوعه مو طبيعيه من كثرهم ننسى اسماء العطور احيان
بس من توفت الله يرحمها
بطلت وكسرتهم كلهم يوم وفاتها
محد غيرها كان يشاركني جنوني
الله يرحمش يالغاليه

[أحلآهم أتحدآهم]

أول شيء يسلموو قطراات " حائرهـ على الموضوع الرائع ..

هوايتي مو غريبه تقريباً أغلب البناات الي بعمري يحبونها ويعملونها..

واذا دق الجنون دق بالرقص خلوني ارقص وماوقف هههههههههههههههههههههه


ماتخيل حالي اكبر ومارقص صدقوني بتصيروو ضعاااف اذا رقصتو كل يوم رياضه من غير تعب هخخخخخ

>> عامله فيها انصح ..

حتى خواتي يقلوون ان شاء الله تاخذين لش رجل مايرضى ترقصي هههههههههههه

بس من جد احس بإحساس رووعه

[اسمي ملاك]

أني اضحك
لما اقر رواية او حتى واني اقعد ع المنتدى لازم محد يكون معاي لو ويش ابطل ادخل نت ههههههههههه
واحب لخيول بشكل كبير لهذا مسوية دفتر وكل يوم أحط صورة الي خيل ههههههههههههه

[قطرات حائرة]

اقتباس: المشاركة الأصلية كتبت بواسطة ام عباس وزينب  هههههههههههههههه نفس الهوايه اكتشفت عندي دفاتر امغبره من سنة الجنانوه هاشميات يسموها الاجانب مرض نفسي الاكتناز هههههههههههه لايدرو عنا بس خخخخخخخخخ

ههههه لا آني استخدمهم لمذكراتي واحتفظ فيهم >> يعني مو فاضيين
حتى صديقتي اذا احتارت وش تهديني تجيب لي دفتر