شايف مرات انت قاعد عادي ماكو شي ومرة وحده ما تدري شالسالفة تحس عواااار قوي يمر صوب القلب، مثل صيخ قچوه في قلبك ولا غرزة إبره، واذا تنفست يزيد عليك… بعدها بثواني يروح كل شي وترد طبيعي. شالسالفة؟! 
ملاحظة مهمة: أنا مو طبيب ولا مختص، بس قمت دورت عن الموضوع ولقيت مقالة تشرح الوضع ترجمتها، مراجعة الطبيب المختص دايما هو الحل الأمثل وانا قاعد اكتب عن السالفة من باب التدوين فقط.
المهم، عاد تقعد تفكر يا إلهي عندي مشكلة بالقلب!؟! ولا عبالك كانت بتحوشك سكتة! 
واحسب انك الحمد لله متعافي وصغير بالعمر مافيك شي حسب ما تعرف، بس تخاف تجيك مع الطبيب وتطلع فيك مشكلة وتحرق بالك تفكير بالموضوع، بعدين تقول يااااا
معوووووود هذي ما تصير فيني إلا من متى لي متى ماكو شييييي ان شااااء اللههههه 
اللي يضحّك ان وايد من الناس حوالينك يحوشهم هالشي بس محد اييب طاري من
الخرعه لووووول
ومع ان العوار صوب القلب اثاري هذي مو سكتة قلبية ولا يعني عندك مشكلة في القلب، علميّا يسمون هالحالة “Precordial Catch Syndrome” أو يختصرونها PCS
، ولها مسميات ثانية مثل “a stitch in the side” أو “Texidor’s twinge”. هالحالة تحوش اليهال والشباب تحت العشرين أكثر من الكبار بالسن ويمكن تييك كذا مرة
باليوم أو كل جم يوم أو مرة بالسنة، حتى درجة الألم تختلف بين الناس.
العوار اييك بشكل مفاجئ مو شرط تكون قاعد تركض أو تلعب كرة، مرات وانت قاعد تطالع تلفزيون اييك ويستمر معاك حوالي 30 ثانية إلى جم دقيقة مع تدرّج بالعوار. ويوم
يروح تحس مثل داخلك متأثر لي الحين من الحالة لي قريب نص ساعة جدام، مثل اللي شاتوه كره على ويهه ويحس ويهه انصلخ لي ثاني يوم چني مصختها ها 
؟ لوووول
العلماء ما قدروا يحددون سبب هالحالة بالضبط ومن شنو تصير لأنها عشوائية حيل، يعني ما قدروا يدرسون الحالة بالتفصيل، بعضهم يقولون احتماااااااااال عدم انتظام التنفس
له دخل بالموضوع وهم استقامة الجسم بس مو متأكدين. اللهم لاحظوا ازدياد هالحالة عند اللي قاعدين بدون شغل أو منسدحين أكثر من غيرهم، صج مو قشمره.
أكثر نظرية مقبولة حالياً ان هذا يا جماعة مو أكثر من “قرصة عصب” عابره او تشنج عضلي خفيف.
ولا تحاتي ترى يبصمون لك بالعشر انها مو خطره ولا يعني ان عندك مشكلة لا من قريب ولا من بعيد، والحالة ما تحتاج لها دوا وأصلاً مافي أدوية حقها. إذا تبي تخلص من
العوار بسرعة بس خذ لك نفس عميق وابلع الهوا، راح تتأذى شوي بس تفتك من الحالة أسرع.
زين عيل متى تحاتي ويكون عندك مشكلة؟
- إذا العوار امتد ووصل لي فوق رقبتك قريب الفك، أو طاف ذراعك.
- إذا حسيت بثقل على صدرك، مو بس عوار.
- الألم ما يختفي ولا يخف حتى بعد 24 ساعة من أخذ مسكن الألم آيبو بروفين – ibuprofen.
- تحس بصخونه.
- مع الألم تكح ويطلع بلغم.
- العوار يكون شديد حيل تحس روحك بتطلع من خشمك وتقعد تشاهق.
- ويهك يروح لونه أو براطمك أو أظافر ايدك تصير زرقه.
- تحس نبض قلبك قام يخوره مو منتظم.
- تحس ما فيك حيل تتنفس، غير عن يوم تقدر تتنفس بس تتعور مثل ما قلنا فوق.
إذا حاشك شي من هالحالات اللي فوق لازم تروح الطبيب بسرعة عشان يجيك عليك
.
وما تشوفون شر ان شاء الله
</B></I>
14-01-11, 09:59 AM
شسالفة هالعوار المفاجئ في الصدر صوب القلب؟
العرض المتطور
المواضيع المتشابهه
