صبحكم الله بالخير
يبو جعفر, ما تشوف لك شوفه وي هاللايف محماسوه مكدادوه؟!!
ويش امسوي بعد؟..يا انتين يا هلجاهل....حاطه دوبش و دوبه كانه ابناوش ما كأنه ولد ولدش...ويش تمبي منه عفر بغى بو ابليس؟
و الله يبو جعفر عندي نفانيف و صراوله متفتـگين يمبى ليهم اخياط, مت عليه بالعدابين, چان يوديهم لجارتنا ام باگي, اتخيطهم, يرد عليي ابكل گواية اعيون: ما أوديهم إلا العشرة أريل گدام أول!!!....شفت يبو جعفر مصبنة هالزمن؟...
إيــــــــــــــــــــــــــه يم جعفر, مصبنة هالزمن...انتين گلتيها...شوفيه على ويش مفطوم, مفطوم على السريلاك و حليب النيدو, و اللي ينفطم على ديلا أكيد گيمة امه و گيمة الگوطي واحد...و تمبيهم يصيرو زي مصبنة اللول...اللي الواحد فيهم ما يـگدر يحط اعيونه في اعيون امه و ابوه من زود الحيا و الإحترام!!!....إيــــــــــــه يم جعفر گالها المنفل و صدگ:
"راحت ارجال اتناطح الدروازه...جتنا ارجال المطنزه و العازه"
الدروازه, معناها البوابه...و الدوازه هنا المقصود بها دروازة الديره, حيث أن الديره في القديم كانت مسوره بسور عالي و فيه ثلاث دروايز شرقيه و غربيه و شماليه.
حرف الهاء
حرسكم الله مع السلامه