[المتدقدق]

مساكم الله بالخير

على طاري السنانير...يتراوى ليي ما في أحد يحب السنانير مفلاتي أنا و ولد أختي معتوگوه....من زود امحبتنا ليهم , كنا كل يوم انسبحهم و اندعچهم ابصابون نعيم و شامبو....و اللول عاد ماكو شامبو ماركه منجيز الحين...ما فيه اللا شامبو مال اعبي النسوان داك الأحمر بس....ونضربهم مناكير و انكحلهم, حتى الحنا انحنيهم, خصوصن ليالي الناصفه و المواليد....و ادا هي سنوره, خرگنا أداينها و لبسناها تراكي رانگول, غير المعاضض و البرابيش....و انأكلهم أحسن الأكل و انشربهم حليب البگر و عصير الطماطه و العرنجوز...حتى أضكر كنا انروح چبرة السمچ و اللحم اللي صوب رغيف تاروت (هدموهم من زمان), و انخم ليهم اللي يرموه السماچه و الگصاصيب من اللحم و السمچ.....إيه ضكرت بعد, كنا انسميهم بأسامي, زي "موشي ديان, نكسون, جونسون, كسنجر, گولدا مائير" و لو بعدنا للحين انربيهم, چان جورج بوش و كندره رايس أول الأسامي ....مره من المرات طلعت الضهر صوب عانة البستان, واللا أسمع صوط ما في حياتي اسمعته...ولا سيارة الحرايگ يا كافي الشر....ما وصلت للعانه اللا هادا جارنا برهوه رامي سنور أسود من النوع الشيطان فيها, أنا مستغرب چيفه گدر عليه...كانت العانه متطمطمه و صايره غزيره و السنور مايعرف يسبح....صار يفتر فيي الماي يفتر, اتگول خلاط بيض....و كلما جا مسكين بيطلع, گام برهوه و دزه بالعصايه وهو يناوي و حال لسانه يقول (النجده, الحأوني)....و ضل على هلحاله أزيد من فلاف ساعات, حسه باح و عواينه صارت أحمر من بسرة اخنيزي, ما فك داك السنورالمسكين إلا گولة الله أكبر لأدان المغرب....جو لرجال يصبغو الوضو للصلاه و شافو حالة داك السنور, گامو طردو برهوه و دارو للسنور وطلعوه من الما, راسه داير و حالته حاله....بالله عليك لو هو جني چان صار اللي صار له....بس كلشي جايز...لا يحق لنا أن ننكر إذا لم نستطع أن نثبت.

حرسكم الله مع السلامه