[المتدقدق]

صبحكم الله بالخير

اقتباس: المشاركة الأصلية كتبت بواسطة umali  والله كنت طفشانه قرأت القصه وفطست من الضحك ,ماشاء الله عليك سويت حفله بدرامات ,ذكرتنا بزيت كلارا والله أني نسيته ماشاء الله كيف تذكر هاالأشياء شكلك ذاكرتك قويه ماتذكر شئ عن دكان العماني .

اقتباس: المشاركة الأصلية كتبت بواسطة umali  ذكرتني باالمصريين ألا يقولوا أمي مسافره وهاأعمل حفله بس ياريت ماتجيش على غفله عساك على القوه

ويش اللي امطفشنش يم علي؟...لا يكون خسرانه انتين بعد في الأسهم؟,,,,لا بارك الله في جورج بوش و لا في اللي أررفه...هو من صار رئيس و جه التيس و العالم مي شايفه الخير شافو له كفن انشا الله...و اتگولي كيف تدكر هلأشياء....و اشلون أنساهم...ادكر گوطي الملح اللي مرسوم عليه وحده حامله شتريه و تحت أباطها گوطي الملح و هو يتنغر و اللا شاي أبو لخيول و العربات أو السيويه أبو الكرتونةالطويله لونها أصفر أو الشخاط ماركة النسر...واجد لو باعدد ما ننگضي...لكن تدري ليش داكرتي گويه؟..أنا أگول لش: اللول و احنا جهال إدا امهاتنا طلعو لعين العوده يغسلو البسطه (الثياب يعني), يخلونا وي جداتنا...و ادا جعنا حطو لينا تمره في ملفع, هي سهايه و هي امغدي في نفس الوكت (طبيعي خالي من المواد الحافضه و الكيماويات) ما يصير الواحد فينا ولد ستة اشهر الا گايم يردح و السانه و لا السان كاسيكو...مو مفلات الحين يا كافي الشر...المفل أنا طبقته ابحدافيره بس بدل امي صار أبويي...أختي ام علي بمناسبة بدئ الموسم الدراسي, لي قصه ان شا الله تعجبكم...حاولي ما تضحكي هليومين...دمت بصحه و عافيه.

اقتباس: والله أنا أول مرة أدش على باب التراث00وسوت سالفتك فيني العجب وتذكرت اول وزمان أول ياحلاته 00مشكور00 ساتابع المزيد بشغف00

ولا ويش يوسيم يأكال الأسكريم أول مره اتدش؟...لا يكون اتخاف؟...لا اتخاف اعيوني, ترى منتدى التراث مفل البراحه اللي يريح الواحد نغسه فيها و يطير لهموم و لغموم عنه و ابدون ما يدفع گرش أبو سنور...و أنا يتراوى لي الحين بعد اللي شفته من العجب بتدش كل يوم...گريت السالفه اگرايه سوت فيك العجب, عجل ويش حال اللي انخبن ابداك الدست؟...سعدت جدن جدن بدخولك العشه لأول مره....أتمنى لك الموفقيه و النوم على الشبليه.

حرسكم الله مع السلامه