[سيدة الأحلام]

صلوا على محمد وآل محمد واذا صليتوا على النبي لا تنسوا ابو الفضائل علي عليه افضل الصلاة والسلام




راح عبيد يدور في البلادين من بلد الى بلد يبغي يشوف مرأة اغبى من مرته الى ان وصل في يوم من الأيام بلد وجلس يستريح على جدار بيت دور ( بيت الدور المبني من حجز وسافات مثل بيوت الا نسميها عربي ) وسمع هذا الحوار يدور بين رجال اسمه حميد ومرته

حميد : اخذي يا مرأة هذي فلوس مكدة العمر وشقى السنين احفضيها عندش
الزوجة : من وين اليك هذي الفلوس
حميد : اقول اليش شقى عمري مجمعنه من زمان وخاشنه لكن هذي الايام انتين تدري بعت الحلال ( يعنى البقر والغنم ) وجبت الفلوس وقلت اخليها عندش الى ان اشوف نخل اشتريه وانتين تعرفي النخل احسن من الحيوانات وبلاهم واذا شفت النخل با أطلب الفلوس من عندش
الزوجة : زين وقت الا تطلب الفلوس هذا هم عندي بارزين

طلع حميد من بيته وهنا عبيد جته الفكرة قال في نفسه ( هذي الفلوس هي الا بتعوضني عن ارزاق رمضان ) راح طق الباب على المرأة وطلعت المرأة وقفت على الباب من الداخل
المرأة : من في الباب
عبيد : انا صديق زوجك مرسلني اليش
المرأة : ويش يبغي توه طالع من البيت
عبيد : ايه نعم كلامش صحيح وابشرش ترى زوجك حصل نخل وارسلني آخذ الفلوس الا توه عطاش وياهم عشان بيدقع قيمة النخل
المرأة : زين دقيقة وحدة واجيب الفلوس

وراحت المرأة وجابت الفلوس وعطتها الى عبيد واخذ عبيد الفلوس وعود ديرته فرحان عشان عوض الا ضاع منه وعرف ان فيه اغبى من مرته هذا حال عبيد ونشوف ويش حال حميد

جاء المسكين حميد في آخر النهار الى بيته واذا زوجته تسأله
الزوجه : بشر انشاء الله النخل زين وفيه رطب مكود
حميد : اي نخل يا مرأة أي رطب أي خرابيط
الزوجة : النخل الا اشتريته اليوم
حميد : انا ما اشتريت نخل
الزوجة : لكن انت طرشت واحد اخذ الفلوس عشان تدفع قيمة النخل واني عطيته الفلوس
حميد : ويش تقولين هذا شقى العمر عطيته رجال ما تعرفيه
الزوجة : قال هو من طرفك
حميد : من طرفي انا ما ارسلت احد انتي ماتفهمي تعطي الفلوس واحد وابس انشاء الله تعرفيه بس
الزوجة : لا ما اعرفه قال انت مطرشنه واني عطيته الفلوس
حميد : عطيتي الفلوس واحد ما تعرفينه ويش اسوي الحين ما تعرفي ان المال عديل الروح


وقام حميد يلطم على رأسه وهو يردد ( ما عاش حالي بعد مالي ) ويش اسوي ويش اسوي الى ان هدأ قال الى زوجته شوفي انا مانا قادر اشوف خلفتش في وجهي انا طالع الحين ان شفت وحدة اغبى منش عودت واذا ما حصلت وحدة اغبى منش عرفي انه الفراق بيني وبينش

وطلع حميد يدور في البلاد عن امرأة اغبى من مرته

ياترى بيحصل وحدة اغبى من مرته او لا ؟؟؟؟


نتابع غدا بأذن الله

قولوا ويش أستفدتوا ويش فهمتوا

تحياتي التراثيه