[align=justify]كنت قد وعدت بإنزال يوميات الأعضاء .. إلا أن المنتج الرسمي قام يلف ويدور .. لأنه ما بيعطينا بيزات زي الناس والأوادم .. فشفنا ليكم منتج فاني من .. جزر وادي الفشاخذ والجواعن .. لبيع المصارين !
ولدت البونية امونة في السنة الفالفة من القرن الخرخيري
عاشت في بيت أمها العودة ..
أصيبت يوماً بكسر في ضرسها الفالف وهي في السنة الأخيرة من الحضانة ..
تتمتع امونة بقلب مرهف شحنة واجد .. في يوم من الأيام شافت كلب يدوس فوق سنورة .. ما قدرت مسكينة وجلست تصيح يا كلب قوم عن السنورة لا تقتلها قوم يا نحيس ما تقوم لاه .. بجيب لك عظمة بس دقوم عاد وش فيك ..!
المهم في ذيك الحزة تخيل لأمونة أن الكلب يتكلم .. قال ليها .. يا امونة ولسان حال الكلب يقول لامونة انا ربي سماني الكلب .. ما اعرف الوفى لأهلي ولا لجيراني تبغيني ما ادوس على السنورة حقوية لا يكون تنسب لك هي .. !
مسكينة امونة بطبعها مرهفة وتحب الخير لشحنة الناس ..
المهم جمعت قوتها في قوطي صلصل وقالت يا أنا يا أنت يا كلب .. ولبست ليها جوتي من ستي شوز بعشرة ريال .. ورفسته كم رفسة .. لين قام يعاوي .. جيفه جت قوتها في ذيك الحزة ما يندرى .. !
كبرت البونية امونة وراحت المدرسة .. مسكينة هي على نياتها تعامل الناس على وزنة وحدة لا تميل لا للشرق ولا للغرب .. تعرفت على وحدة في ذاك الصف .. أول ما تعرفت عليها .. شافتها شاطرة قالت ما شاء الله خوش أبنية .. بعدين ما تشوفها إلا كل شوي وما تجيب طاري البنات ... هذي بنت فلانة وذيك بنت فلانة وذيك اخوها فلان يشتغل في البقالة الفلانية ويبيع نخج .. وساعات نقول له يحط لينا ( كتشب ) ويحط لينا ( ماينوز ) على شان يعاندنا ونتحجى وياه وايدات ..
وهالبنية ما تخلى ولا تبقي في خلق الله .. صايرة برج مراقبة ... بس صناعة تايوانية
البنت اللي تتحجى عليها قدامها تمدح فيها من فوقها لين تحتها !!
امونة أستغربت تقول أكيد دي مريضة مصابة بالحمى الوادع المتصدع ..
بعد فترة عرفوا بنات الفصل أن هالبنية دي تتكلم عليهم ... قالوا لازم على البيت نحط فيها دست خوش خوش .. المهم ما لحقت ديك لبنة تطلع من المدرسة إلا طاحوا فيها البنات رفيس واجموع .. ودست في عمرها مسكينة عورت باللفاد .. طلعت امونة وشافت الهوشة .. شافت ان لبنة اللي تتحجى على البنات تنضرب .. قامت وحامت عنها وبدل ما يضربوا في البنية صار الضرب في امونة مسكينة وعلى عليّ عليها .. راحت فيها بنت الناس والسبب دفاعها عن البنية .. شافوا البنت أن امونة اللي تنضرب .. وقفوا الضرب وأسعفوا امونة إلى المستشفى وتركوا ديك البنت بدون إسعاف .. حتى أغمي عليها في ذيك الحزة ... وتركت بروحها لا صديقة افتكرت فيها ولا نفر مر وحن عليها اسعفها؟
بس امونة تجمعوا حواليها الطالبات اللي كانوا يدرسوا وياها وجابوا ليها هدايا واجد يمكن ترسة عين .. كل هذا لأنها تحب الخير للجميع !!
في السنة الفلافة والفلافين بتقويم الخرخير راحت امونة الجامعة وكل بنت تتمنى تصير وياها في الغرفة .. احتارت امونة من تسكن وياها .. فقالت ليهم كل ليلة أني بسكن ويه وحدة منكم !
فختارت حب الجميع ..!
السموحة للأخت العزيزة أمونة عن ما بذر أعلاه
ولكن نظراً للشركة المنتجة " جزر وادي الفشاخذ والجواعن ... لبيع المصارين "
أختار لنا اسمكم الموقر من ضمن أولى الحلقات اليومية ..!
نرجو في حال تقديم شكوى ضد مضمون الحلقة مراجعة " شركة البغاريف " لبيع البغروف ابو راسين !
شارع السرو .. بالقرب من مزرعة حجي علي ..!
الحلقة القادمة
يوميات احلام حور 
المخرج المنفذ ..
فروس حزون .....
[/align]