أمثال مغبرة

[روح الحياة]

أمثال مغبرة !!

أعزائي حبيت أشارك هالمرة بطريقة مختلفة

وبارك الله في الوالدة ما قصرت معاي الله يحفظها :

1_ يرقص على الطلية جيف مطر

2_ كفن ببلاش … باموت

3_ على دق الطبل ترقص أم اردوح

4_ نوخذايين في سفينة طبعوها

5_ راسه في الساس ويقول..هدّوني له

6_ محسود لعور على كبر عيونه

7_ ترقص بلا صروال.. جيف مصرولة

8_تييك التهايم وانت نايم !

9_ وش لك بالبحر واهواله ورزق الله على السيف

10_ شين وقوي عين

××××××××××××××××××××××××××××××××××××
جيف: كيف
الطلية: الرطوبة
الساس: البناء ..مضغوط على رأسه
هدّوني: اتركوني
صروال: السروال أو (البنطلون)
* أرجو أن ينال إعجابكم وآسف على التقصير…

[أرض الغري]

ادويش غبرتوا لينا المحل بهالمشاركة العتيقة لكن ماعليه مشاركتك جخه وياريت تورينا وحده تانيه





حتى حجيي خليتيه يصير عتيق من غبرتش

[ضــ الشموع ــوء]

والله انت فلته ياروح الحياه صحيح مغبرين امثالك وجابو لنا الكحه لكن حلوين موووووت اختك ضـــ الشموع ــــوء

[حسين الرويعي]

مشاركة حلوة فعلا

[معاني الحب]

هلا بأهل سنابس وبأمثالها اللي جابت لي ال(كح كح) لكن حلووووووه ومشكووووور على مواضيعك المفيده تذكرنا بأيام أول اللي تحولت ومنتظرين مشاركاتك الجايه :) وعساك ع القوه أختـــــك معاني الحب

[باب العين]

هدا نا گاعد وادور ترافيين ما نا محصل. بس زين جيت والله جابك ، عاد لا تگطع زيارتك خلف امك .


عندي امفال من عند جدتي:

الطويلة ما أگواها والگصيرة كلها سلّة يعني النخلة.

هذا المثل يضرب للعجزان اللي مايگدر يسوي شي ويستحج.

مفل فاني : جدع العماري ما يتعرش عليه.( جدع نخلة العمارية)

يضرب هدا المثل للضعيف اللي ما يتكل عليه . أو ما يگضي حاجة.

مع تحياتي والرجوع في ما بعد ان شاء الله.

[القرمبع]

بسم الله

نايبه اتهلب عليك يروح الموز گصدي روح الحياه أول شي بسألك الحياه من وينه ليها روح أول مره أسمع ابهاالخبر ياالغبر أمزح مو تزعل ترى أنا گلت ليكم شيبه وملگوف اتحملوني واللي ابيزعل باجننه أزيد

الك مني هالمفلين

ما ضيگت الزريبه الا الديايه الغريبه

هيايه ولابسه مشمر

الگرمبع

[روح الحياة]

القائم .. ضــ الشموع ــوء .. مياس .. معاني الحب .. باب العين ..

القرمبع ..أتمنى أن تدوم هذه الغبار كما يصفها بعضنا .. شتان بين الغبار


الذي كان يعيشه آبائنا وبين غبار اليوم ..



باب العين والقرمبع .. معجبٌ أنا بكما .. حافظوا على ما لديكم ..



روح الحياة

[باب العين]

روح الحياة ، شحوالك واحوال جهالك.

اهل الأول يحبوا السمچ واجد ، حتى الجواف يا كلوه ، مو مفلات اهل هالزمن كل شي يتحمگوا عليه.

والجواف والميد داخل بطنه سرورو ، واهلنا يطلعوا السرورو ويشكوه في خوصة مالت نخيل ويطبخوه او يگلوه.

واللي ما يحبوا الجواف بسبب سلاليه يعني أشواكه ، ياكلوا بس السرورو

عاد أهل الاول ضربوا مثل وگالوا : ما أحب لجواف ما أحب الا السرورو !

[باب العين]

لو تهاوش ، باب العين والقرمبع ، طبعا القرمبع بيغلب ، بس باب العين ويش بيسوي ، بيجط الحرة في ، اخو القرمبع الصغير .

والمثل يگول ، ما يگدر على الحمار ، حطها في العدة.
يكرم أخويي العزيز القرمبع.

العدة : هي السرج اللي يحطوه على الحمار.


لو واحد معاشه فلافة آلاف ، وهو هات صرف من غير تدبير ، يجي آخر الشهر مديون بألقين .

ويش نگول له : مد رجولك على گد لحافك

باب العين يتمشى في السوگ، ويشوف فقير ، يگوم باب العين يمد أيده على سحارة الرطب وياخذ منها چف ويعطيها للفقير ، راعي لرطب يسأل ليش تسوي كديه، باب العين يگول هدا فقير.


المثل يگول : كريم من مال غيره.

[باب العين]

في كل زمان ومكان ، مااحد يذم نفسه أو بضاعة يبيعها أو خضرة .

هنا ضربوا مثل وقالوا : ما حد يگول لبنته حامضة.

الله جل وعلا جعل الأرزاق في كل مكان . وفي ناس يدوروا على العمل الصعب مع وجود الأعمال السهلة.

عاد گال اللي يضرب لمثال: اشلك بالبحر واهواله ورزگ الله على السيف.


لو واحد فيه خير ، فيه شهامة ومروة أو رجال يتكل عليه , ينعرف مهما خفي الأمر.

مثلنا عليه يگول : الديچ يزعگ من بيضته.

[باب العين]

ما ميش اح في ها الديرة ، الله يمسيكم ويصبحكم بالخير ، يا هل التراث.

ادا واحد مو فالح في شي وين لا في المدرسة لا في المزرعة ولا في أي شغلة.

ويشو المثل اللي ينگال عليه ؟



هدا هو المثل: حطوه في لطبالة ماطبل ، حطوه في لزمارة مازمر.


في واحد مو متمسك بنصيبه ، وحطه ، أو واحد عنده بيت أو سيارة ، فكر يبيع بيته أو سيارته ،بس ماضمن يحصل بيت أو سيارة گبل لا يبيع،

لما باع بيته أو سيارته ، ما حصل غيرهم .

المثل : لا حضت برجيلها ولا خدت سيد علي.


لو واحد يدعي انه رجال ، يگدر يسوي ويعمل والى آخره ، ولما يجربوه يطلع خرطي.

المثل اللي ينضرب : عجل باروح اياكم السلوگ !

[DIAMOND]

(إذا شفت صاحبك حلو لاتاكله كله )

(إذا شفت لعصابه قول عنه مضروب)

(إذا شبع الحمار نهق )

(إذا شفته فى جارك حسبه فى دارك )

(إذا شفته يسبك ترى قلبه يحبك )

(إذا شفتهم يطالعونك كل وبحلق إعيونك )

إذا شفتني في القطيف قطفني تقطيف )

[ضـــوء القمــر]

مشكور أخوي روح الحياه وعندي لك امفال مغبره وكشخه ان شاءالله تعجيبك هالمفال اداهم خدهم:

*سكّانه مرته ( مساكين انتو يالرياييل نتحكم فيكم احنا)
*تعلم الحسونة في روس القرعان (رايحين فيها هالقرعان)
*عطي القرص خبازه ولو اكل منه نتفه ( ايه والله)
*يامن شرى له من حلاله عله ( والله بلشة)
*لعور على العميان باشا ( من قدك ياأعور خذ فرصتك)
*محسود الفقير بموتة اليمعه ( مسكين حتى على الموتة محسود هالفقير)

[روح الحياة]

كل المشاركين في هذه الصفحة أقدم لهم شكري العميق على إثراء هذه الصفحة بالأمثال القديمة التي يجب أن تكون معنا حتى تصل إلا ما بعدنا .....

DIAMOND...ليس لنا غنى عنك وعن ما تقدمه لنا من أمفال حليوه وشكراً لك..
ضوء القمر ...اشوي اشوي علينا عاد ومشكوره على المشاركة الفله دي ..

شرايكم بهالمفل ... اللي ينوح واللي ماينوح ياكل عيش لحسين


تحياتي / روح الحياة