كيف تضع صورة في توقيعك !!

[فتى تاروت]

مرحبا شباب

موضوع اليوم عن وضع صورة في التوقيع كيف ؟؟؟؟ هذا السؤال منتشر بشكل كبير في منتديات الحوار وخاصة منتدى تاروت الثقافي عشان كذا

حبيت أني أحط هذا الموضوع وبالصور في المنتدى وإليكم الموضوع

أولاً أنت تريد وضع صورة أسفل موضوعك يعني في التوقيع عشان كذا أنت حدد أول وش الصورة الي تبغى تحطها في توقيعك وهيه موجوده وين

إذا كانت هذه الصورة موجودة في الانترنت فهذا سهل ما فيه مشكلة تقدر تحطها في توقيعك وأما إذا كانت في جهازك فأنت تحتاج أنك تحط هذه

الصورة على الانترنت بعدين تحطها في توقيعك خلينا نتكلم ألحين عن الطريقة الأولى وهي كيف أنك تحط صورة في توقيعك وهذه الصورة من

الانترنت أول شيء روح إلى الموقع الي فيه الصورة الي تبغى تحطها في توقيعك مثلاً أنا دخلت موقع www.google.com

ويوم دخلت ( أدخل وياي عشان تطبق ) شفت صورة في الموقع وعجبتني مثل ما هو واضح في الصورة رقم واحد






في هذه الصورة أنا دخلت الموقع وشفت الصورة الي هي كلمة google

ملونة وعجبتني أبغى أحطها في توقيعي كيف ؟؟ خلينا نبدأ الشغل

شوف أنت ألحين تروح إلى الصورة وتوقف عليها وتضغط بالزر الأيمن للفأرة راح تطلع لك قائمة زي هذه القائمة




أو مثلها بس بالعربي المهم أنت تروح إلى الخيار الموضح في الصورة أو الناس الي عندهم عربي يختاروا خصائص

بعد ما تسوي هذه العملية راح تطلع لك نافذة جديدة تتكلم عن خصائص هذه الصورة الي وقفت عليها بالشكل التالي




لاحظ أنا مأشر بالأزرق على كلام وشي هذا الكلام

هذا الكلام هو عبارة عن عنوان الصورة على الانترنت في الموقع

يعني أنت ألحين لازم تسوي مثلي في الصورة وتقوم تنسخ عنوان الصورة كامل مثل ما أنا سويت

وبكذا تكون أنت حصلت على عنوان الصورة الي تبغى تحطها في توقعيك

وألحين خلينا ندخل منتدى تاروت عشان نحط الصورة في توقيعنا تمام

إذا دخلت إلى الموقع من الصفحة الرئيسة إلى المنتدى راح تشوف الأزرار هذه في الأعلى





طبعاً مثل ما هو موضح في الصورة انت روح إلى الزر

ملفك

بعدها راح تدخل إلى ملفك الشخصي في المنتدى وتشوف عدة خيارات شوف هذه الصورة





في هذه الصورة هنا الخيارات الخاصة بك انت روح مثل ما هو موضح في الصورة إلى

تحرير الهوية

تمام بعدها راح تطلع لك قائمة طويلة بالخيارات الي أنت تتحكم فيها طلع في الخيارات لين توصل إلى خيار اسمه التوقيع

وصلنا ألحين إلى التوقيع راح تلاقي مربع جنبه مثل هذا شوف الصورة الي تحت





مثل ما هو مكتوب في الصورة هنا تلصق عنوان الصورة الي عملنا له نسخ بعد التعديل وش المقصود بالتعديل إذا أنت حطيت عنوان الصورة عادي

مثلاً www.google.com/imges/hp1.gif

ما راح تطلع ليش ؟ لأن المنتدى يفكرك أنت حاط عنوان لموقع إنترنت ما يدري أنك تبي تحط الصورة في توقيعك لكن فيه طريقة تخلي المنتدى

يعرف أنك تبي تحط هذه الصورة في توقيعك كيف ؟

الحركة هيه أنك في المربع مال التوقيع تكتب عنوان الصورة بهذه الطريقة انتبه زين

[img]عنوان الصورة[/img]

وانتبه لا تترك أي مسافة وانسخ العنوان صح لأن أي خطأ ما راح تطلع الصورة وبعدين اضغط على اعتماد التعديلات في نهاية الصفحة وكذا تكون

أنت حطيت الصورة في توقيعك وأنتهت المشكلة

قبل ما نختم الموضوع فيه ناس تسأل طيب ليش المنتدى هذا ما يرح حاله ويخلينا نحط صور في أجهزتنا وأنتهى الموضوع

أنا أرد على هذا السؤال

لما أنت تكتب موضوع تمام وتطلع من الانترنت وتوقيعك فيه صورة من جهازك أنت طلعت من الانترنت خلص

يجي أعضاء المنتدى يدخلوا إلى الانترنت ويدخلوا على المنتدى وموضوعك

المنتدى جالس يحمل الموضوع لما يجي يبغى يحمل الصورة الي في توقيعك ما يقدر لأنها موجودة في جهازك وأنت برى الانترنت

عشان كذا صارت هذه العملية غير متاحة في هذه المنتديات

لكنك تقدر تحط صورة في مواقع الانترنت لأنها راح تكون موجودة على طول

ملاحظة بعد لما أنت تحط صورة من موقع وهذا الموقع يخترب مثلاً أو يغير مكان الصورة الي انت حاطها في توقيعك ما راح تطلع الصورة في توقيعك

لأن عنوان الصورة وقتها راح يكون غلط !! عرفت علي

بعد إذا مدينة الملك عبدالعزيز قامة بإغلاق الموقع ما راح تطلع الصورة لأن الموقع ممنوع وممنوع تستخدم أي شيء منه صور أو ملفات يعني

ما تقدر توصل له

أرجو أن يكون الموضوع مفيد

@ فتى تاروت @

[ريحانة ولأية]

شكراَ على المعلومات ...

من وقت طويل و أنا أريد كيف يصنعو التوقيع ؟

أكرر شكري...

[فتى تاروت]

مشكور أخوي oscar على الرد

وأنا كتبت رد على مثل هذا السؤال أكثر من مرة لكن جاني أكثر

من استفسار عليها فقلت أشرحها بالصور أفضل

فتى تاروت

[وصي سلمان]

الاخ فتى تاروت مشكور مع اني ما فهت ويش قلت ، المهم انا ما احط صور ولا اعرف ليها ، اريد منك يا خوي ماكن انزل منه اللي يشغل الاصوات ( يسموه ريل بلير ) لو سمحت ، لاني سمعت المرحوم سلمان ينعت فيك ويقول انك خبير (بالراء) وشكرا على طيب العريكة

[فتى تاروت]

العفو

مو لازم تفهم

وهذا رابط البرنامج

http://www.alhosoon.com/progs/rp8-setup.exe

فتى تاروت

[المحتار]

تسلم اخي فتى تاروت على الموضوع الممتاز وياريت لو تحط لينا طريقة وضع صورة متحركة تحت اسمك في النتدى وعساك على القوة دوم.


اخوكم ................................. المحتار

[ام مهدي]

مشكور أخوي فتى تاروت
نستنى الطريقة الثانية
تشاو

[الأميرة حواء]

ماشالله ماشالله ولاشرح مدرسه
بس ماني حاطه صوره
ليش
سالت ليش
لاني مافهمت
مشكور استاذ فتى
والله خوش استاذ
احاول في المرات الجايه 0000اذا شفت صوره يعني عرفت

[Rash Man]

مرحبا بك يالحبيب ..


تسلم يالطيب على الشرح الي اكثر من رائع ....


طيب اخويي الي مايبغى يحط التوقيع من الانترنت يعني


من الجهاز نفسه ... ياريت تعلمنا شلون ...


وفي شغلانه ثانيه بعد ابغي اعرف كيف يحطو توقيع جنب الاسم



وبعدين ابشرك انت شاغلنا ....


من صرت مشرف وما نشوفك تبين..


انت وعدتني انك راح تعلمني طريقه التشغيل للبالتوك على ارامكو


يالله مو مشكله , بسيطه ( عزيز وغالي )


نستناك يالطيب ....


سلام .

[musa]

مدري هـــو صح والا لأ مع جزيل الشكر

[musa]

حاولت ولكن باءت محاولتي بالفشل

[فتى تاروت]

مشكورين على الرد

الأميرة حواء إن شاء الله تفهمي في المواضيع الجاية

أخوي Rash Man يسلم راسك أصبر علينا شوي

إن شاء الله أخوي المحتار ما يصير خاطرك إلا طيب

أخوي musa نسيت تحط عنوان الصورة بين الأقواس

[img]عنوان الصوورة[/img]

راجع الشرح مرة ثانية وإن شاء الله تنجح في وضع الصورة

فتى تاروت

[الأسطورة]

أخوي فتى تاروت أنا عندي صورة نسيت من وين حفظتها
كتبت فيها وعدلتها وحطيت فيها إميلي وهي في الجهاز
هل بإمكاني أن أحولها إلي صفحة ويب

[aquarius]

مرحبا ومشكور على هذا الموضوع وانا خطيت لى توقيع وجيت اجربه هنا وانشااااااااء الله يطلع

[فتى تاروت]

aquarius

نجحت

عقبال بقية الدروس

فتى تاروت