شنـــو رايكم بنات ؟؟

[شيعيه]

ثاكنس على المرور نورتوا صفحتي
....

اما أني /

اشوى ماعندي نسوان اخو خخخــ ^_^
لآن لو عندي ويطلعوا كذا ( كسولات) كان ياقاتل يامقتول ههههـــ
<<< ماعندي كيري ميري

كان اجي اقول ليهـا اختاري بتغسلي المواعين
لو تغسلي الحمامات
<<< شريره عفر هههههههـــ


يسلموا حبوبات على المرور ...

بس نبغي رأي الشباب لو كانت زوجاتهم ( رجول على رجول )
وامه وخواته يكرفوا في المطبخ ..

شنو رده فعله ؟؟

[هناء المغربي]

* هل زوجه ألولد ملزومه بالشغل او هي مسأله ذووق ومشاركه ؟
من باب الذوق .. بعدين هي تعتبر مو غريبة من أهل البيت يعني ..
ماهي مشكلة لو قامت اتحركت ، في الحركة بركة ..
* ما موقفك لو كانت زوجه أخيك من هذا الصنف ( الكسولات ) ؟؟
يوم الا تجي بنخلي كل وحده تاكل في صحن خاص فيها ، و لما تخلص تشيل صحنها معاها و تغسله ..
و يسلمو شيعية ..

[مملكة القلوب]

موضوع رائع

[شفتِ دمعتي؟؟]

* هل زوجه ألولد ملزومه بالشغل او هي مسأله ذووق ومشاركه ؟
من رايي مي ملزوومة انهاا تشتغل ...
بس هي صارت من أهل البيت يعنو هي وذوقهاا اتقوم لو لا ..
اماا انهاا ملزومه لالا مو ملزومه ..

* ما موقفك لو كانت زوجه أخيك من هذا الصنف ( الكسولات ) ؟؟
شــي راجع ليهـاا وهذا يعكس شخصيتهاا في بيتها.

يسلمو شيعية ع الموضوع ..

[شمس الأصيل]

شيعية مشكورة على الموضوع في البداية..

من وجهة نظري القاصرة .. الولد أو الأخ له دور في هذا الشئ..:ممنوع الت
هو صحيح المرأة مو ملزومه على قولة البنات.. بس الوحده المفروض تعمل بطيب أصلها..
ولا تحسب أنها بتكون خدامة ليهم.. زي ماقلتو هي بتنظف وبتسوي هالشي لمن؟ ليها ولعيالها ولزوجها في الأول والأخير
ولا هي غريبة.. مدام قبلت بالشخص اللي تزوجته ملزومه تقبل بأهله
وتحطهم فوق راسها بعد.. لأنهم أقل شي أختاروها من دون غيرها تكون مرت ولدهم..

عن نفسي بالعكس يشرفني اني أساعد في بيت أبويي أو بيت عيالي أو حتى صديقاتي
أقوم أساعدهم لاني مو غريبة ولا أحب الخيابة..

همسة لكل زوجة... لا تحطي في نفسش أنش خدامة اذا قمتي وساعدتي..أعتبري نفسش في بيتش..

تحياتي

شمس الأصيل

[السحاب الأبيض]

]* هل زوجه ألولد ملزومه بالشغل او هي مسأله ذووق ومشاركه ؟
هي مو ملزومة بس من باب الذوق انها تقوم تساعد .. اجل تاكل جاهز مجهز .. تستحي شوي

وتقوم اذا ماتعرف تطبخ تشيل على الاقل اغراض السفرة او تغسل وش يبي له غسيل المواعين

مو تقعد كذا زيادة عدد أو زيها زي الصبيان ..

* ما موقفك لو كانت زوجه أخيك من هذا الصنف ( الكسولات ) ؟؟

اشوى ماعندي زوجات اخو .. والله لا يعطينا زوجة أخو كسولة ... بس لو صار هالشي اكيد

باخذ منها موقف .. يمكن اصارحها حتى لو زعلت بس مايصير نتعب وهي مرتاحة

احنا في البيت 4 و الحمدلله متعاونين كل وحدة تسوي شي ..

يسلموووو شعشع

[فاطِمة فتح الله]

وانا اقرأ الموضوع حسيت متفشله خخخخخ

انا بعد مااسوي شيء في بيت عمي ..

اذا قلت لهم بغسل مايرضوا .. يقولوا روحي قعدي .. والله اكثر من مرة ..

ساعات اسوي حلا وأوديه ساعات <<<باودي هالاسبوع ناوية ..

وشهر رمضان اسوي شيء وأوديه واذا ماسويت امر بيت امي وأخذ من اللي طبخته ..

وساعات اشيل السفرة .. وبعض الصحون ..

لكن ترى استحي على دمي .. والله يا شيعيه مو يعني ماعندي ذوووق ..

بالعكس احس فيهم وأحبهم واجد ..

وبعد اغلب الاحيان حمواتي المتزوجات يجيبوا شغالاتهم يعني ماليي دور بس اكل وهذرة ..

لكن ترى لو قالوا لي قومي فطووم غسلي مواعين باقوم وانا مبسوووطة والابتسامة شاقة الحلق لأنهم زي خواتي واكتر .. باحس ان مابيننا حواجز ..

سلملم

[pink lady]

هلا كيفكم؟؟؟


بصراحه لو هذول نسوان اخوتي مااسكت
يعني ياأمي تتفاهم مع اولادها يعلموا نسوانهم الدرابه
والذووق أو تقول اليهم لا يجوا البيت إحنا مو خدم إليهم
وإلى اولادهم وبلاها هالجمعه يايجوا يشتغلوا يا لا يجوا
محنا مستفيدين منهم إذا اقل حاجه مايسووها ويشيلوا السفره
معناتها في كبرها مابقوموا فيها...

بس أني بصراحه في بيت عمتي أقوم واقعد بالعكس اني ابغى احببهم فيني وابغاهم يمدحوني دايماً ومايقولوا اني مقصره وكل مااهله حبوني زادت محبته الي بعد ....

وكل وحده تعمل بأصلها وتربيتها مااتوقع لوحده منهم تسمع امها هالكلام بترفع راسها فيها بقولوا غنها فشلتهم لنه الناس وشو بقولوا بقولوا هذي أهلها ماعرفوا يربوها
دايما البنت تتصرف ويرموا السبب على الاهل...:داير راسه

تحياتيـ...

[الحراقة]

* هل زوجه ألولد ملزومه بالشغل او هي مسأله ذووق ومشاركه ؟
نعم , ليش ماحسبت نفسها من أهل البيت ولا للحين مفكره حالها غريبة , السالفة سالفة ذوق ومشاركة وحالها من حال حمواتها يعني اهي أخت لهم قبل ما تكون زوجة لأخوهم.
* ما موقفك لو كانت زوجه أخيك من هذا الصنف ( الكسولات ) ؟؟
أكيد بزعل منها , لكن بمسك أخوي وبصارحه وبقول له مايصير هذا الكلام لا تخلي خواتك يكرهو زوجتك بسبب مثل هذا.

وبالنسبة لي: أفرح لما أشوف زوجتي تساعد وتشتغل في بيت ابويي , والله تكبر في عيني الغالية.

موضوع مميز شعشع..

تحياتي لك..

[أسيل]

امم ,, بصراحه وباختصار الموضوع يرجع في النهاية لـ الزوج
إذا قبل أن تقوم أمه وأخواته بكل شي فلا عتب على الزوجه !

و أضيف أن المرأة الذكيه هي من تتقرب و تتود لأهل زوجها .

[منهاج علي]

مشكوره شيعيه على الموضوع, سبحاان الله توني من كم يوم اتكلم ويا جارتي عن هذي السالفه >> بس غناتي جبتها عدل

بالنسبه لي اذا رحت بيت عمي أحاول اساعدهم والله بس لآني بيت عمي كلهم أولاد بس بنت وحده واني وحده مااعرف اطبخ بمشمر وعباتي كأني اذا لبستها واني اطبخ, فقررت اذا بجلس للعشاء اما اخلي زوجي يشتري من المطعم أشياء خفيفه او اني اطلع اجي الشقه والغداء أفضل اودي حلى لآن اسوي الغداء صعبه المشكلة حمياني مو كل شيء يعجبهم يعني مااعرف ذوقهم كيف ..!!

همسه للكل..
مساعدتك ومعاونتك يدل على حبكِ للأهل زوجك (ساعديهم ولو بأعداد الحلى الأسبوعي)..

ودمتم بكل ود,,

[البتول العذراء]

سلاااااااااااااام

بما أن شيعية أرسلت لي رسالة شكر ..

على مشاركتي بموضوعها

و تقول الموضوع حلاالش

صدقت رووووووووحي و رجعت من جديد

بس ما بهدر على نسوان الأخوة

في و الله نسوان أخوة ينحطوا على الجرح يبرأ

أتذكر أخوي قبل يخطب كل يقول أبي زوجة زي فلانة ..

ولما خطب قلنا لزوجته أخوي يبيش مثل فلانة البيت بيتش و أخوتي أخوتش ..

مو تستحي و الغرفة اللي هم فيها ما تدخليها

جاء بيأكلوا منش !!!!!!!!!!

بتكلم عن البنات الخيب الكسولات
سواء قبل الزواج و الله بعد الزواج

لا تساعد أمها لا وهي بنت و لا حتى إذا تزوجت ...

لا و القهر إذا جات تأخذ الغذا و العشاء من بيت أبوها

أو وقت الأكل تجي بيت أبوها تأكل و تشبع و آخر شيء تقوم

زميلتي تقول زوجة أخوها من هالنوع

تقول يشتروا الأكل و يودوها بيت أبوها

أمها اللي تطبخ لهم

و تالي زوجها يجي يأخذ الأكل

وأخوش ساااااااااااااكت

قالت عادي

وتشتغل مرة أخوش قالت لالالالالا
قلت لها بيسكت بيسكت بعدين بينفجر

عجبوني البنات اللي يساعدوا أمها

ما شاء الله وحده من قرايبنا بناتها خدومات

يساعدوها بكل شيء >> طالعين على أمهم

يطبخوا و ينظفوا ويدها بيدهم

الله يحفظها لهم و يخليهم و بالغه فيهم معاريس ياااااااااارب

وأن شاء الله الكل يكون متعاون البنات و نسوان لولاد

[حياة احلى]

زوجة الولد صحيح هي موملزومة انها تشتغل في بيت اهل زوجها بس اذا كان عندها ذوق بتساعدهم لانهم صاروا في منزلة اهلها والزوجة لما تقوم بالشي عشان زوجها اولا والافضل ان الزوج مايدخل بهالامور لان هي مو صغيرة بيضربها على ايدها عشان تشتغل...بس هادي شيمه منها...


فالبنت لما تساعد امها في بيتهم لازم امها تأمر عليها عشان تسوي شي وحتى لو امها خافت عليها ماتبغا اتعبها هذا مايعني انها ماتعلم نفسها اوتستفيد من تجارب الاخرين في الحياة وماتعتبر نفسها ضيفه في بيتهم فنقطة البداية هي بيت المرأة لبناء حياتها المستقبلية...فمشاركة زوجة الولد في بيت اهل زوجها هذا لايعني انها ملزومة بهذا الشيئ ولكنه من طيب اصلها..فزوجة الولد صورة لزوجها..تمثل زوجها في كل شيئ..


واذا لقوا اهل الولد هذه المعاملة الطيبة من زوجته ومحبتها لهم من محبة زوجها فسوف يعاملوها ليست كزوجة ولد بل كوحدة من بناتهم وبيحطوها في عيونهم...


واخيرا (يد الله مع الجماعة) التعاون في بيت العائلة اوغير بيت العائلة لابد ان يكون موجودا بعيدا عن الحساسيات وبعيدا عن المشاكل التي قد تسبب عدم التعاون...(تعاونوا على البر والتقوى ولاتعونوا على الاثم والعدوان)..


عذرا على الإطالة


تحياتي حياة احلى

[فاطِمة فتح الله]

والله يا البتول .. فيه بنات مايسوو شيء في بيت امهاتهم والسبب المثل الصيني اللي يقول "الام النشيطة تعلم بناتها الكسل" وأنا دايما اقول لأمي هالكلام ..

يعني في بيت ابوي ما اطبخ وحددي اغسل مواعين .. ولما تزوجت شفت نفسي ضايعه بين الصفاري والمقالي ..

وصار لي سنة ونص احس نفسي بعدني اتدرب لكن تمشي الحياة ..

واذا عالمساعده بيت اهل الزوج يمكن ماقصدهم .. يمكن يستحوا .. يمكن تعبانين .. يمكن حوامل .. ويمكن .. ويمكن .. مو ضروري كسولات ..

أنا وحده ماشفت نسوان خيلاني يساعدون ؛؛ لنهم خجولات حتى ياكلوا معنا .. وما احس احد انتقدهم أو قال من وراهم المفروض يتحركوا ويساعدوا و .. و ..

هي كلها ليلة في الاسبوع اللي يجوا فيها ..

امممم البعض يقول لو قامت زوجة الولد بتصير قريبة من الاهل والاخوات ..

انا نسوان خوالي أحسهم قريبات جدا جدا بالتواصل والزيارات بيني وبينهم مو عشان وقفت معاي بالمطبخ وغسلت لها كم ماعوووون ..

طبعا اتكلم عن البيت اللي فيه شغالات مايحتاج لا انا ولا هيه ولا عمتها توقف تغسل ..

يعني ميري الشغالة موجودة خخخخ

سلملم

[البتول العذراء]

هلا بأم أحلى أقمار ربي يحفظهم

وبالغين فيهم معاريس يااااااااااارب

اقتباس: المشاركة الأصلية كتبت بواسطة ام الاقمار  الحمد لله مرت اخوي مي من هالنوع لو صارت كذي اكيد بنكلمها احسن من نحش وراها

هذاك قالت ليهم

تقول لها اليوم عليش السلطة

أو عليك تجهز الفاكهة

أو اليوم عليش تغسيل الصحون

وش قامت تقول ؟؟

تتامر عليي وهي وأخواتها أميرات

وصاااااااااااااارت ما تجي يوم جمعت العيلة

خسرت هي وولادها هذا الجو الأسري الرائع ومحبة جدهم وجدتهم وأهلهم كلهم

أحسه أحلى يوووووووووووووم بالنسبة لي طبعا

اليوم اللي أكون في اقرب لعائيلتي ..

لأن باقي الأيام ساعة أو أقل ما يمدينا فيها شيء

و باقي الأيام بيتنا شبه ميت ..

ما في حركة الإ لما يجوا الجهاااااااااااال و يوسعوا صدورنا